इराणच्या सर्वोच्च नेतेपदी मोजतबा खामेनेईंची निवड; डोनाल्ड ट्रम्प म्हणाले, "बघुया, पुढे..."

मोजतबा खामेनेई यांची इराणचे सर्वोच्च नेते म्हणून निवड करण्यात आली. या निवडीनंतर अमेरिकेचे अध्यक्ष डोनाल्ड ट्रम्प यांनी पहिल्यांदा प्रतिक्रिया दिली. 

अमेरिका-इस्रायलच्या हल्ल्यात इराणचे सर्वोच्च नेते अयातुल्लाह अली खामेनेई हे मारले गेले. त्यानंतर सर्वोच्च नेता म्हणून कोण असेल, याकडे सगळ्यांचे लक्ष होते. इराणच्या धार्मिक परिषदेने मोजतबा खामेनेई यांची सर्वोच्च नेता म्हणून निवड केली. या निवडीबद्दल अमेरिकेचे अध्यक्ष डोनाल्ड ट्रम्प यांना विचारण्यात आले. त्यावर त्यांनी सूचक प्रतिक्रिया दिली. 

अयातुल्लाह अली खामेनेई यांचाच मुलगा मोजतबा खामेनेई यांची सर्वोच्च नेते म्हणून निवड झाली. त्यानंतर टाइम्स ऑफ इस्रायलशी बोलताना ट्रम्प यांनी एक विधान केले. ट्रम्प म्हणाले की, "बघूयात, पुढे काय होतंय ते. खामेनेईंचा मुलगा हा एक कमकुवत माणूस आहे आणि लोकांना न स्वीकारलेला उमेदवार आहे."

...तर जास्त काळ टिकणार नाही

मोजतबा खामेनेई यांच्या निवडीचे संकेत मिळत असतानाच डोनाल्ड ट्रम्प यांनी भूमिका मांडली होती. एबीसी न्यूजशी बोलताना ट्रम्प यांनी म्हटले की, 'इराणच्या नव्या नेत्याचा कार्यकाळ हा अमेरिकेच्या समंतीवरच अवलंबून असेल. जर आमची त्याला मंजुरी नसेल, तर नवा नेता फार काळ टिकणार नाही.'

दरम्यान, फॉक्स न्यूजच्या कार्यक्रमात अध्यक्ष ट्रम्प म्हणाले की, 'या निवडीवर मी खूश नाहीये."  

जगाच्या शांततेसाठी ही खूप छोटी किंमत 

ट्रम्प यांनी मध्य पूर्वेतील संघर्षामुळे निर्माण झालेल्या तेल संकटाबद्दलही भाष्य केले आहे. तेलाच्या किंमतीही वाढत असून, ट्रम्प म्हणाले की, 'कमी काळासाठी तेलाच्या किंमती वाढल्या आहेत. इराणचा अणुऊर्जा धोका संपल्यानंतर हे दर झपाट्याने कमी होतील. अमेरिका आणि जगाच्या सुरक्षेसाठी, तसेच शांततेसाठी ही खूप छोटी किंमत आहे", अशी भूमिका ट्रम्प यांनी मांडली.