Israel Iran War: इस्रायल आणि इराणमधील युद्ध दिवसेंदिवस धोकादायक होत चाललं आहे. गेल्या ६ दिवसांपासून सुरू असलेल्या या युद्धात, इस्रायल सातत्याने इराणच्या अणु आणि तेल प्रकल्पांना लक्ष्य करताना दिसत आहे. प्रत्युत्तरामध्ये इराण देखील इस्रायलवर सतत क्षेपणास्त्रे डागत आहेत. अशातच इराणने इस्रायलविरुद्ध अखेर युद्ध पुकारले आहे. इराणचे सर्वोच्च नेते अयातुल्ला अली खामेनी यांनी बुधवारी एक्स पोस्ट करत युद्धाची घोषणा केली आहे. अयातुल्ला अली खामेनी यांनी आपले अधिकार इराणी सैन्याकडे सोपवले आहेत.
इराण आणि इस्रायलमधील युद्ध थांबताना दिसत नाहीये. आता अमेरिकेनेही उघडपणे युद्धभूमीत उतरण्याची तयारी दर्शविली आहे. अशातच इराणचे सर्वोच्च नेते अयातुल्ला अली खामेनी यांनी अधिकृतपणे युद्धाची घोषणा केली आहे. खामेनी यांनी इस्लामिक रिव्होल्यूशनरी गार्ड कॉर्प्सला महत्त्वाच्या अधिकार सोपवले आहेत. खामेनी यांना त्यांच्या कुटुंबातील सदस्यांसह ईशान्य तेहरानमधील एका भूमिगत बंकरमध्ये हलवण्यात आल्यानंतर ही घोषणा करण्यात आली आहे.
अयातुल्ला अली खामेनी यांनी आधी "महान हैदरच्या नावाने, युद्ध सुरू झाले आहे," अशी पोस्ट केली. त्यानंतर काही वेळातच, खामेनींनी इस्रायलला इशारा देत, "आता दहशतवादी झिओनिस्ट राजवटीला कडक प्रत्युत्तर दिले पाहिजे. आम्ही त्यांच्याबाबतीत आता कोणतीही दया दाखवणार नाही," असं म्हटलं. या घोषणेनंतर इराणने इस्रायलवर २५ क्षेपणास्त्रे डागली.
या आधी अमेरिकेचे राष्ट्राध्यक्ष डोनाल्ड ट्रम्प यांनी इराणचे सर्वोच्च नेते खामेनी यांना आत्मसमर्पण करण्यास सांगितले होते. "इराणचे सर्वोच्च नेते अयातुल्ला अली खामेनी कुठे लपले आहेत हे आम्हाला माहिती आहे. पण सध्या तरी त्यांना ठार मारायची इच्छा नाही," असं डोनाल्ड ट्रम्प यांनी म्हटलं. तसेच , इराणमध्ये नागरी वस्त्यांवर आम्हाला हल्ले करायची इच्छा नाही. मात्र आमचा संयम आता संपत चालला आहे, ही गोष्टही खरी आहे. इराणने अणुकरार करणे आवश्यक होते. त्यांना तशी विनंतीही मी केली होती. मात्र इराणने ते मान्य केले नाही. आता चर्चा करावी असे वाटत नाही, असंही डोनाल्ड ट्रम्प म्हणाले.