Ayatollah Ali Khamenei on Iran Israel Ceasefire: इराण आणि इस्रायलमध्ये गेल्या १२ दिवसांपासून सुरु असलेल्या युद्धाबाबात मोठी घडामोड समोर आली. इराण आणि इस्रायल यांच्यात सुरू असलेले युद्ध संपल्याची घोषणा अमेरिकेचे अध्यक्ष डोनाल्ड ट्रम्प यांनी केली. मात्र इराणने हा प्रस्ताव स्पष्टपणे नाकारला आहे. डोनाल्ड ट्रम्प यांच्या घोषणेनंतर इराणचे सर्वोच्च नेते अयातुल्ला अली खामेनी यांनी प्रतिक्रिया दिली. इराण हे शरणागती पत्करणारे राष्ट्र नाही असं खामेनी यांनी म्हटलं आहे. दरम्यान ट्रम्प यांनी यु्द्धबंदीची घोषणा करताच इराणने इस्रायलवर अनेक क्षेपणास्त्रे डागली.
इराण आणि इस्रायलमधील युद्ध आता एका नवीन वळणावर येऊन पोहोचलं आहे. इराणच्या अणुऊर्जा प्रकल्पांवर हल्ला केल्यानंतर डोनाल्ड ट्रम्प यांनी दोन्ही देशांमधील युद्धबंदीची घोषणा केली. डोनाल्ड ट्रम्प यांनी एक्स पोस्टमधून युद्धविरामाची घोषणा केली. सर्वांना अभिनंदन! इस्रायल आणि इराणमध्ये एक करार झाला आहे की ६ तासांच्या आत संपूर्ण युद्धबंदी लागू होईल. इराण पहिल्या १२ तासांसाठी युद्धबंदी पाळेल, त्यानंतर इस्रायल. २४ तासांनंतर, हे युद्ध संपल्याचे मानले जाईल, असं ट्रम्प यांनी म्हटलं. मात्र इराणने हा प्रस्ताव नाकारल्याचे दिसत आहे.
इराणचे सर्वोच्च नेते अयातुल्ला अली खामेनी यांचे एक मोठे विधान समोर आले आहे. "ज्यांना इराणी लोक आणि त्यांचा इतिहास माहित आहे त्यांना माहिती असेलच की इराणी राष्ट्र शरणागती पत्करणारा देश नाही," असं खामेनी यांनी एक्स पोस्टमध्ये म्हटलं.
दरम्यान, ट्रम्प यांच्या युद्धबंदीच्या घोषणेनंतर, इराणने इस्रायलवर ६ वेळा बॅलिस्टिक क्षेपणास्त्रांनी हल्ला केला आहे. एक क्षेपणास्त्र बेरशेबा शहरातील एका इमारतीवर पडले. या हल्ल्यात ४ जणांचा मृत्यू झाला आहे, तर अनेक जण जखमी झाले आहेत. त्याआधी इराणचे परराष्ट्र मंत्री अब्बास अराघची यांनी इस्रायलसोबत युद्धबंदीच्या वृत्ताला नकार दिला होता. "इस्रायलसोबत अद्याप कोणताही अंतिम युद्धबंदी करार झालेला नाही. जर इस्रायलने हल्ले थांबवले तर इराणही हल्ला करणार नाही," असं अब्बास अराघची म्हणाले.