मागील काही दिवसांपासून अमेरिकेचे राष्ट्राध्यक्ष डोनाल्ड ट्रम्प आणि उद्योगपती इलॉन मस्क यांच्या वाद सुरू आहेत. मस्क यांनी ट्रम्प यांच्याविरोधात सोशल मीडियावर पोस्ट शेअर केल्या आहेत. दरम्यान, आता ट्रम्प आणि मस्क यांच्यातील वाद मिटल्याचे समोर आले आहे. मस्क यांनी आता या पोस्टबद्दल खेद व्यक्त केला आहे.
एलॉन मस्क-डोनाल्ड ट्रम्प यांचे ब्रेकअप; धमक्या अन् ‘यू टर्न’ सुरू, अमेरिकेचे राजकारण रंगात
इलॉन मस्क यांनी एक पोस्ट शेअर केली आहे. यामध्ये त्यांनी लिहिले की, "गेल्या आठवड्यात राष्ट्राध्यक्ष डोनाल्ड ट्रम्प यांच्याबद्दलच्या माझ्या काही पोस्टबद्दल मला वाईट वाटते. त्या खूप पुढे गेल्या."
इलॉन मस्क-डोनाल्ड ट्रम्प यांचे ब्रेकअप
टेस्ला व स्पेसएक्सचे सर्वेसर्वा इलॉन मस्क यांच्या कंपन्यांशी असलेल्या करारांत कपात करण्याची घोषणा अमेरिकी राष्ट्राध्यक्ष डोनाल्ड ट्रम्प यांनी केली आहे. यावर अंतराळवीरांची, तसेच इतर साहित्याची आंतरराष्ट्रीय अंतराळ स्थानकावर ने-आण करण्यासाठी वापरल्या जाणाऱ्या ‘ड्रॅगन कॅप्सूल’ची सेवाच बंद करण्याची धमकी मस्क यांनी सोशल मीडियावर दिली.
डोनाल्ड ट्रम्प आणि इलॉन मस्क यांच्यातील अचानक झालेल्या या मतभेदामागील सर्वात मोठे कारण म्हणजे 'वन बिग ब्युटीफुल बिल' विधेयक आहे. इलॉन मस्क यांनी या विधेयकावर टीका केल्यानंतर डोनाल्ड ट्रम्प यांनी प्रत्युत्तर दिले. 'मस्क यांना हे विधेयक माहित होते. त्यांनी सरकारी पद सोडेपर्यंत त्यांना त्यावर कोणताही आक्षेप नव्हता', असा दावा ट्रम्प यांनी केला.
टेस्लाचे सीईओ इलॉन मस्क ट्रम्प प्रशासनाच्या अंतर्गत डिपार्टमेंट ऑफ गव्हर्नमेंट एफिशियन्सीचे प्रमुख म्हणून काम करत होते. इलॉन मस्क यांनी अमेरिकेचे अध्यक्ष डोनाल्ड ट्रम्प यांचे दावे खोटे असल्याचे म्हटले. 'मला कधीही विधेयक दाखवण्यात आले नाही आणि ते रात्रीच्या अंधारात इतक्या वेगाने मंजूर झाले की काँग्रेसमधील कोणीही ते वाचूही शकले नाही', असं प्रत्युत्तर मस्क यांनी दिले होते.