कॅनडामधील टोरांटो शहरातील ग्रीक टाऊन परिसरात रविवारी (22 जुलै) उशिरा एका व्यक्तीनं अंदाधुंद गोळीबार केला. या गोळीबारात एक महिलेचा मृत्यू झाला असून अन्य 13 जण जखमी झाले आहेत. जखमींमध्ये एका लहान मुलाचाही समावेश आहे. जखमींना हॉस्पिटलमध्ये दाखल करण्यात आले आहे.
टोरांटो पोलिसांनी दिलेल्या माहितीनुसार, गोळीबार करणारा हल्लेखोरदेखील ठार झाला आहे. ग्रीक टाऊनमधील एका हॉटेलमध्ये अंदाधुंद गोळीबार सुरू असल्याची माहिती देणारा फोन आला. हॉटेलमधूनच रात्री जवळपास 10 वाजण्याच्या सुमारास हा फोन आला होता. यानंतर पोलिसांनी घटनास्थळी धाव घेतली.
प्रत्यक्षदर्शींनी दिलेल्या माहितीनुसार, हल्लेखोराने जवळपास 25 गोळ्या झाडल्या. या घटनेमुळे परिसरात गोंधळ उडाला. दरम्यान, जखमींची प्रकृती गंभीर असल्याची माहिती समोर आली आहे.