तेहरानमध्ये रक्ताचा सडा! इराणमध्ये महागाईविरुद्धच्या आंदोलनाला हिंसक वळण; २१७ जणांचा मृत्यू

तेहरानसह इराणमधील अनेक शहरांमध्ये शुक्रवारी रात्री प्रचंड हिंसाचार झाला असून, आतापर्यंत २१७ आंदोलकांचा मृत्यू झाल्याची धक्कादायक माहिती समोर आली आहे.

इराणमध्ये गेल्या दोन आठवड्यांपासून सुरू असलेल्या आंदोलनाने आता अत्यंत रौद्र आणि हिंसक रूप धारण केले आहे. महागाई आणि बेरोजगारीविरुद्ध सुरू झालेली ठिणगी आता थेट धार्मिक नेतृत्वाविरुद्धच्या वणव्यात रूपांतरित झाली आहे. राजधानी तेहरानसह देशातील अनेक शहरांमध्ये शुक्रवारी रात्री प्रचंड हिंसाचार झाला असून, आतापर्यंत २१७ आंदोलकांचा मृत्यू झाल्याची धक्कादायक माहिती समोर आली आहे. परिस्थिती हाताबाहेर गेल्यामुळे इराण सरकारने संपूर्ण देशातील इंटरनेट सेवा खंडित केली आहे.

महागाईच्या विरोधात सुरू झाला होता लढा 

या जनक्षोभाची सुरुवात २९ डिसेंबर २०२५ रोजी झाली होती. इराणच्या चलनाची (रियाल) घसरण आणि वाढत्या महागाईमुळे त्रस्त झालेल्या व्यापाऱ्यांनी सुरुवातीला तेहरानमध्ये दुकाने बंद ठेवून आंदोलन सुरू केले. ३० डिसेंबरला विद्यार्थीही या आंदोलनात सामील झाले. मात्र, हळूहळू या आंदोलनाचा रोख बदलला आणि लोक थेट सत्तेतील धार्मिक नेतृत्वाच्या विरोधात रस्त्यावर उतरले.

हॉस्पिटल्समध्ये मृतदेहांचा ढिगारा 

तेहरानमधील एका डॉक्टरने दिलेल्या माहितीनुसार, शहरातील फक्त ६ मोठ्या रुग्णालयांमध्ये २१७ मृतदेहांची नोंद करण्यात आली आहे. यातील बहुतेकांचा मृत्यू गोळीबारात झाला आहे. आंदोलनात आतापर्यंत ५ लाखांहून अधिक लोक सहभागी झाले असून २ हजारांहून अधिक जण जखमी आहेत. या संघर्षात इराणच्या सुरक्षा दलातील १४ जवानही मारले गेले आहेत.

मशिदींना आग आणि बँकांची लूट 

आंदोलकांनी आपला संताप व्यक्त करताना सरकारी मालमत्तेचे मोठे नुकसान केले आहे. तेहरानच्या महापौरांनी दिलेल्या माहितीनुसार, आंदोलकांनी आतापर्यंत २५ मशिदींना आग लावली, २६ बँकांमध्ये मोठी लूट केली, १० सरकारी इमारती खाक केल्या, ४८ अग्निशमन दलाच्या गाड्या आणि ४२ बस जाळून भस्मसात केल्या. लष्कराच्या कॅम्पवरही हल्ले करण्यात आले आहेत.

संपूर्ण देश 'ब्लॅकआऊट'वर 

इराणमधील २० प्रांतांतील सुमारे ११० शहरांमध्ये हे लोण पसरले आहे. परिस्थितीवर नियंत्रण मिळवण्यासाठी सरकारने कडक पावले उचलली असून २३०० हून अधिक जणांना अटक करण्यात आली आहे. देशातील सर्व शाळा, कॉलेजेस आणि विद्यापीठे बंद ठेवण्यात आली असून इंटरनेटवर बंदी घातल्यामुळे बाह्य जगाशी इराणचा संपर्क तुटला आहे.