अमेरिकेचा महाभयंकर पलटवार; इराणच्या १७ युद्धनौका उद्ध्वस्त, २००० तळांवर बॉम्बवर्षाव!

इराणने डागलेली ५०० हून अधिक बॅलिस्टिक क्षेपणास्त्रे आणि २००० ड्रोनचा हल्ला अमेरिकेने केवळ रोखलाच नाही, तर त्याहीपेक्षा भीषण पलटवार केला आहे.

मध्यपूर्वेतील आखाती देशांमध्ये सध्या युद्धाचा वणवा पेटला असून, अमेरिका आणि इराण समोरासमोर आले आहेत. इराणने डागलेली ५०० हून अधिक बॅलिस्टिक क्षेपणास्त्रे आणि २००० ड्रोनचा हल्ला अमेरिकेने केवळ रोखलाच नाही, तर त्याहीपेक्षा भीषण पलटवार करत इराणचे कंबरडे मोडले आहे. अमेरिकन सेंट्रल कमांडने दिलेल्या माहितीनुसार, या कारवाईत इराणच्या १७ युद्धनौका आणि पाणबुड्या समुद्रातच गाडल्या गेल्या असून, त्यांच्या २००० हून अधिक लष्करी तळांना लक्ष्य करण्यात आले आहे.

'लोकमत महाराष्ट्रीयन ऑफ द इयर' कोण?... क्लिक करून आपलं मत नोंदवा!

इराणची 'ती' चूक आणि अमेरिकेचा महाप्रहार

इराणने इस्रायल आणि अमेरिकन तळांना लक्ष्य करण्यासाठी आपल्या भात्यातील सर्व ताकद पणाला लावली होती. मात्र, अमेरिकन लष्कराने अत्याधुनिक तंत्रज्ञानाचा वापर करून हे सर्व हल्ले हवेतच नष्ट केले. यानंतर खवळलेल्या अमेरिकेने इराणच्या अंतर्गत भागात घुसून हल्ले चढवले. अमेरिकन सेंट्रल कमांडचे अधिकारी ब्रॅड कूपर यांनी दावा केला आहे की, "आज अरबी समुद्र, होर्मुजची सामुद्रधुनी किंवा ओमानच्या उपसागरात इराणचे एकही जहाज शिल्लक राहिलेले नाही. आम्ही त्यांचे नौदल पूर्णपणे निकामी केले आहे."

खामेनींच्या मृत्यूनंतर इराण पेटला, पण...

या युद्धातील सर्वात मोठी खळबळजनक बातमी म्हणजे इराणचे सर्वोच्च नेते अयातुल्ला खामेनी यांच्यासह अनेक वरिष्ठ नेत्यांचा मृत्यू झाला आहे. २८ फेब्रुवारीपासून सुरू झालेल्या या भीषण संघर्षात इराणला मोठे नेतृत्व गमवावे लागले आहे. यामुळे इराणने आता 'आरपार'ची लढाई पुकारली असून इस्रायलचे पंतप्रधान बेंजामिन नेतन्याहू आमच्या निशाण्यावर असल्याचे जाहीर केले आहे. मात्र, दुसरीकडे इस्रायली हवाई दलाने इराणच्या एअर डिफेन्स सिस्टिमवर एकामागून एक हल्ले करून त्यांची सुरक्षा यंत्रणा खिळखिळी केली आहे.

होर्मुजच्या समुद्रात जहाजांच्या रांगा, दहशतीचे वातावरण

युद्धाच्या या भडक्यामुळे जागतिक व्यापाराचा मार्ग असलेल्या होर्मुजमध्ये सध्या भयाण शांतता आहे. जगातील विविध देशांची जहाजे तिथे थांबून आहेत, मात्र कोणाचीही पुढे जाण्याची हिंमत होत नाहीये. इराणकडून कधीही हल्ला होऊ शकतो, या भीतीने जहाजांवरील कर्मचारी धास्तावलेले आहेत. समुद्रात इराणचे १७ जहाजं उद्ध्वस्त झाल्याने सर्वत्र आगीचे लोट आणि ढिगारे दिसत आहेत.

ट्रम्प यांचा कडक इशारा

अमेरिकेचे राष्ट्राध्यक्ष डोनाल्ड ट्रम्प यांनी या कारवाईचे समर्थन केले आहे. "मी जे केले, त्याबद्दल माझे कौतुक होत आहे. इराणवरील हे हल्ले अजून काही दिवस सुरूच राहतील," असे स्पष्ट संकेत ट्रम्प यांनी दिले आहेत. अमेरिकेच्या मते, इराणची हल्ला करण्याची क्षमता आता कमालीची घटली असून, अमेरिकन सैन्याची ताकद मात्र दुप्पट झाली आहे. या युद्धामुळे संपूर्ण जगाचे लक्ष आता आखाती देशांकडे लागले असून, पुढील काही तास इराणच्या अस्तित्वासाठी अत्यंत निर्णायक ठरणार आहेत.