अमेरिकेने इराणच्या अणुप्रकल्पांवर हल्ले चढविल्यानंतर मोठी बातमी समोर येत आहे. आम्हाला युद्ध करायचे नाहीय, परंतू आम्ही तुमच्या फोर्डो, नतांज आणि इस्फहान अणुकेंद्रांवर हल्ले करणार आहोत, असे खुद्द अमेरिकेनेच इराणला एक दिवस आधी सांगितले होते, असा खळबळजनक दावा करण्यात आला आहे.
बॉम्ब फोडूनही अमेरिका काही करू शकली नाही! ३७ तास हवेतच होते ६ बी२ बॉम्बर..., इराण म्हणतेय...
मध्य पूर्वेतील एक न्यूज वेबसाईट अमवाज मीडियानुसार इराणच्या एका वरिष्ठ अधिकाऱ्याने ही माहिती त्यांना पुरविली आहे. हल्ला करणार असल्याची आगाऊ नोटीस अमेरिकेने इराणला पाठविली होती, असे या अधिकाऱ्याने म्हटले आहे.
या अधिकाऱ्याने आपले नाव न छापण्याच्या अटीवर ही माहिती दिली आहे. ट्रम्प सरकारने २१ जूनलाच ही नोटीस पाठविली होती. यामध्ये आमचा उद्देश इराणसोबत युद्ध करायचा नाहीय. आम्हाला फक्त फोर्डो, नतांज आणि इस्फहान या अणूसुविधा केंद्रांवर हल्ला करायचा आहे, असे म्हटले होते.
अमेरिकेने इराणच्या अणुस्थळांवर केलेल्या हल्ल्यांनंतर, संयुक्त राष्ट्रांच्या अणु देखरेख संस्थेने (IAEA) सोमवारी आपत्कालीन बैठक बोलावण्याची घोषणा केली आहे. IAEA चे प्रमुख राफेल ग्रोसी यांनी सोशल मीडिया प्लॅटफॉर्म X वर ही माहिती दिली आहे. तसेच या संस्थेने इराणमध्ये हल्ला झालेल्या ठिकाणांवर रेडिएशनची पातळी वाढली नसल्याचे म्हटले आहे. तसेच आम्ही काही अपडेट आल्यास कळवू, असेही म्हटले आहे. अमेरिकेने जरी यशस्वी हल्ला केल्याचा दावा केला असला तरी इराणने आमच्या अण्वस्त्रांच्या ठिकाणांना कोणतेही नुकसान झालेले नाहीय. ते पूर्णपणे सुरक्षित आहेत. तसेच रेडिएशन लीकही झालेले नाहीय, असे म्हटले आहे. इराणच्या सरकारी मीडियाने ही माहिती दिली आहे. इराणची अणुउर्जा संस्था (AEOI) ने ही माहिती जाहीर केली आहे.
फोर्डोवर ६ बंकर बॉम्ब टाकण्यात आले आणि ३० टॉमहॉक क्षेपणास्त्रांनी इतर इराणी अणुस्थळे नष्ट करण्यात आली. एअर ट्रॅफिक कंट्रोलच्या फ्लाइट ट्रॅकिंग डेटा आणि ऑडिओ कम्युनिकेशन्सनुसार अमेरिकेतील मिसूरी येथील व्हाइटमन एअर फोर्स बेसवरून ग्वाममधील यूएस एअर फोर्स बेसवर बी२ बॉम्बर विमाने जाताना दिसली होती. विमानात मोठा पेलोड असल्याने जास्त इंधन न घेताच ही विमाने झेपावली होती.