अमेरिका किती कपटी आणि संधीसाधू देश आहे हे संपूर्ण जगाने वेळोवेळी पाहिले आहे. एखाद्या देशाला युद्धासाठी उकसवायचे आणि मन भरले की मध्येच त्याची साथ सोडून जायचे हा त्यांचा स्वभावच बनला आहे. भारताविरोधात वेळोवेळी पाकिस्तानला मदत, अगदी बांगलादेश मुक्तीसंग्रामावेळीही विमानवाहू युद्धनौका भारतावर चाल करून पाठविणारा हाच अमेरिका देश. आज त्याने आणखी एका देशाला दगा दिला आहे.
अमेरिकेने सीरियाच्या तत्कालीन बशर अल-असद राजवटीविरुद्ध एक सैन्य उभे केले होते. त्याचे नाव सीरियन डेमोक्रॅटिक फोर्स असे होते. या फोर्सला आता अमेरिकेने वाऱ्यावर सोडले आहे. या मिलिशियाचा वापर सीरिया आणि इराकमध्ये इस्लामिक स्टेटविरुद्धच्या युद्धात पुरेपूर करून घेण्यात आला. आता सीरियात ना असद उरला ना इस्लामिक स्टेट, आपला उद्देश संपताच अमेरिकेने सीरियन डेमोक्रॅटिक फोर्सला त्यांच्या नशिबावर सोडले आहे.
अमेरिकेने ईशान्य सीरियातील दोन लष्करी तळांवरून आपले सैन्य मागे घेतले आहे. काही वर्षांपूर्वी अमेरिकेने अफगाणिस्तानमध्येही हेच केले होते. तालिबानविरोधात अनेक वर्षे युद्ध केले, अफगाणिस्तान ताब्यात घेतला आणि नंतर या भागात सरकार स्थापन करून बोऱ्याबिस्तरा आवरता घेत काढता पाय घेतला. या अफगाणिस्तानमध्ये त्या सरकारला तालिबानविरोधात आठवडाभरही तग धरता आला नाही आणि पलायन करावे लागले. आता तिथे तालिबानी सरकार आहे.
आता सीरियात देखील तेच होण्याची भीती व्यक्त केली जात आहे. अमेरिकेच्या या हालचालीमुळे सीरियामध्ये इस्लामिक स्टेट पुन्हा उदयास येण्याची शक्यता वाढली आहे, असे सीरियन डेमोक्रॅटिक फोर्सेसच्या कमांडरने सांगितले आहे. दोन्ही ठिकाणी सीरियन डेमोक्रॅटिक फोर्सेसच्या लहान तुकड्या तैनात आहेत. अमेरिकी सैनिक नावाला दिसत आहे. लष्करी तळांवर वापरलेले सीसीटीव्ही कॅमेरे काढून टाकण्यात आले आहेत. हसाका प्रांतातील अल-वझीर आणि तेल बेदर तळांवरून अमेरिकेने सैन्य माघारी घेतल्याचे पहिल्यांदाच समोर आले आहे. परंतू, ट्रम्प सत्तेवर आल्यानंतर असे चार तळ रिकामे झाल्याचे सांगितले जात आहे. आणखी तीन तळ खाली करण्यात येणार आहेत. केवळ एका तळावरच सैन्य उपस्थित असेल ते देखील ५०० एवढ्या कमी संख्येने असे सांगितले जात आहे.