इराणच्या अणू केंद्रांवर अमेरिकेने भारतीय वेळानुसार पहाटे साडे चार वाजता जोरदार हल्ले केले आहेत. सर्वात शक्तीशाली बी २ विमानांतून सर्वात शक्तीशाली असलेले बंकर बस्टर बॉम्ब आणि मिसाईल डागून इराणच्या तीन तळांवर हल्ले केले आहेत. ते उध्वस्त झाल्याचा दावा डोनाल्ड ट्रम्प यांनी केला आहे, तर सुरक्षित असल्याचा दावा इराणने केला आहे. अमेरिकेच्या हल्ल्यापूर्वीच बहुतांश युरेनियम इराणने दुसरीकडे हलविल्याचा दावा देखील केला जात आहे. अशातच अमेरिकेच्या हल्ल्यानंतर फोर्डो या अणुतळाचा फोटो आला आहे.
बॉम्ब फोडूनही अमेरिका काही करू शकली नाही! ३७ तास हवेतच होते ६ बी२ बॉम्बर..., इराण म्हणतेय...
इराणचे फोर्डो येथील अण्वस्त्र निर्मिती केंद्र एका विशाल डोंगराच्या खाली होते. सुमारे ३०० फूट खाली असलेल्या या केंद्रावर अमेरिकेने बंकर बस्टर बॉम्बद्वारे हल्ला चढविला. हा बॉम्ब काही अंतर जमिनीमध्ये घुसतो आणि फुटतो. परंतू, त्याची जमिनीच्या आत घुसण्याची क्षमता ही खूपच मर्यादित आहे. यामुळे इराणच्या या भूमिगत अणू केंद्राला कितपत नुकसान झाले असेल, हे अद्याप समोर आलेले नाही.
सॅटेलाईट फोटोतून काही प्रमाणावर अंदाज लावले जात आहेत. या भूमिगत केंद्रात जाण्यासाठी काही टनेल आहेत, ते उध्वस्त झाल्याचे सांगितले जात आहे. यामुळे इराणला या केंद्रात जाण्यासाठी खूप कष्ट घ्यावे लागणार आहेत. म्हणजेच आपल्या केंद्रात किती नुकसान झाले आहे, त्याचे निरिक्षण करण्यासाठी देखील इराणला झगडावे लागणार आहे. फोर्डोवर अमेरिकेने ३०००० पाऊंड वजनाचा बॉम्ब फेकला आहे. असे तीन बॉम्ब या केंद्रावर टाकण्यात आले. या केंद्रामध्ये युरेनियम संवर्धनासाठी 2700 सेंट्रीफ्यूज असल्याचे सांगितले जात होते.
हे सेंट्रीफ्यूज 60 टक्के यूरेनियम समृद्धतेसाठी सक्षम होते. अणुबॉम्ब बनवण्यासाठी ९० टक्क्यांपर्यंत युरेनियम समृद्ध करणे आवश्यक आहे. या साठ्याने इराण तीन आठवड्यात नऊ अणुबॉम्ब बनवू शकला असता.