अमेरिकेने आज इराणच्या ३ अणुकेंद्रांवर जोरदार हल्ले चढवून ते नष्ट केले. फोर्डो, नतांज आणि इस्फहान या केंद्रांवर अमेरिकेने रविवारी सकाळी १२५ लढाऊ विमानांनी हल्ले केले. याच्या १३ तासांनंतर अमेरिकेच्या संरक्षण मंत्रायलयाने या हल्ल्याची माहिती दिली आहे.
जॉईंट चीफ ऑफ स्टाफ जनरल डॅन केन यांनी दिलेल्या माहितीनुसार या ऑपरेशन मिडनाईट हॅमरमध्ये अमेरिकेची १२५ लढाऊ विमाने सहभागी झाली होती. यात सात बी२ बॉम्बर विमाने होती. या बॉम्बर विमानांनी दोन अणुकेंद्रांवर १४ बंकर बस्टर बॉम्ब डागले. तर इस्फहानवर टॉमहॉक मिसाईल डागण्यात आली.
अमेरिकेच्या हल्ल्यापासून इराणला फसविण्यासाठी धोका देण्याची रणनिती देखील वापरण्यात आली. यासाठी काही बॉम्बवर्षाव करणारी विमाने प्रशांत महासागराकडे पाठविण्यात आली. इराणला वाटेल की हल्ला त्या दिशेने केला जाणार आहे, परंतू खरा हल्ला दुसऱ्याच दिशेने करण्यात आला, असेही केन म्हणाले. मिसौरी येथून सुरु करण्यात आलेले २००१ नंतरचे हे सर्वाधिक लांब पल्ल्याचे ऑपरेशन होते. याबाबत प्रचंड गुप्तता बाळगण्यात आली होती. अमेरिकन मिलिटरीच्या काही निवडक अधिकाऱ्यांनाच याची माहिती होती, असे पेंटागॉनने म्हटले आहे.