पाकिस्तान गेल्या काही वर्षापासून आर्थिक संकटात आहे. महागाई मोठ्या प्रमाणात वाढली आहे, पाकिस्तानमधील जनताही महागाईमुळे त्रस्त आहे. या महागाईमधून जनतेला बाहेर काढण्यासाठी पाकिस्तानने आयएमएफकडून मदत घेतली आहे. दरम्यान, आता आधीच कर्जामध्ये असलेला पाकिस्तान आणखी कर्जात बुडणार असल्याचे दिसत आहे. पाकिस्तान चीनकडून स्टेल्थ फायटर J-35A ही लढाऊ विमाने खरेदी करणार आहे. यामुळे आता कर्जात आणखी वाढ होणार आहे. पाकिस्तानच्या अर्थसंकल्पामधून ही माहिती उघड झाली आहे.
पाकिस्तान चीनकडून अत्याधुनिक पाचव्या पिढीतील स्टेल्थ फायटर J-35A खरेदी करण्याच्या दिशेने पावले उचलली आहेत. पाकिस्तानने आपल्या संरक्षण बजेटमध्ये २०% वाढ केली आहे, या अंतर्गत २०२५-२६ आर्थिक वर्षासाठी २,५५० अब्ज रुपये वाटप करण्यात आले आहे. या वाढीचे मुख्य कारण म्हणजे चीनकडून ४० अत्याधुनिक J-35A स्टेल्थ फायटर जेट खरेदी करण्याचा प्रस्ताव आहे.
पहलगाम हल्ल्यानंतर भारत आणि पाकिस्तानमध्ये तणाव होता. यावेळी दोन्ही देशांमध्ये हल्ले-प्रतिहल्ले झाले. या पार्श्वभूमीवर आता पाकिस्तानने संरक्षणावर खर्च वाढवला आहे. तर ऑपरेशन सिंदूर अंतर्गत भारताने पाकिस्तानच्या एअर फोर्सचे मोठे नुकसान केले आहे, यामुळे पाकिस्तान एअर फोर्सवर मोठा खर्च करत आहे.
40 J-35A स्टेल्थ लढाऊ विमाने खरेदी करण्यासाठी चर्चा
पाकिस्तान चीनकडून 40 J-35A स्टेल्थ लढाऊ विमाने खरेदी करण्यासाठी चर्चा करत आहे आणि त्यांची डिलिव्हरी ऑगस्टपासून सुरू होऊ शकते. J-35A हे दोन इंजिन असलेले मल्टीरोल लढाऊ विमान आहे. हे PL-17 क्षेपणास्त्रे आणि अत्याधुनिक AESA रडार प्रणालींनी सुसज्ज आहे. पाकिस्तानी हवाई दलाने या कराराला आधीच मान्यता दिली आहे, वैमानिकांना चीनमध्ये प्रशिक्षण दिले जात आहे.
या करारात चीनने पाकिस्तानला ५०% पर्यंत सूट आणि लवचिक पेमेंट पर्याय दिले आहेत. सध्या, पाकिस्तानची सुमारे ८०% शस्त्रे चीनकडून येतात. भारतासोबतच्या अलिकडच्या लष्करी संघर्षात पाकिस्तानने J-10C लढाऊ विमान आणि HQ-9 हवाई संरक्षण प्रणाली सारखी शस्त्रे वापरली होती.
आर्थिक संकटादरम्यान लष्करी खर्चावर प्रश्न
पाकिस्तान गंभीर आर्थिक संकटातून जात आहे. पाकिस्तानवर आधीच चीनकडून १५ अब्ज डॉलर्सचे कर्ज आहे. याशिवाय, पाकिस्तान आयएमएफकडून ६-८ अब्ज डॉलर्सच्या मदत पॅकेजची मागणी करत आहे. एकूण २६९ अब्ज डॉलर्सचे कर्ज असलेला हा देश कर्ज फेडण्यासाठी त्याच्या जीडीपीच्या १.९% पेक्षा जास्त खर्च करत आहे.