कबरीच कबरी...! इराणवर दुःखाचा डोंगर, खोदल्या जातायत शेकडो कबरी! परराष्ट्र मंत्र्यांनी गाझाचा उल्लेख करत शेअर केला फोटो

हा भीषण हल्ला शनिवार, २८ फेब्रुवारी रोजी दक्षिण इराणमधील मिनाब शहरातील 'शाजारेह तैबेह' या मुलींच्या प्राथमिक शाळेवर झाला होता.

अमेरिका आणि इस्रायलच्या हवाई हल्ल्यांनंतर इराणवर अक्षरशः दुःखाचा डोंगर कोसळला आहे. इराणमध्ये सध्या अत्यंत विदारक आणि हृदयद्रावक परिस्थिती निर्माण झाली आहे. युद्धाच्या पहिल्याच दिवशी १६० हून अधिक निष्पाप शाळकरी मुलींना आपला जीव गमवावा लागला. यामुळे संपूर्ण इराण दुःखाद बुडाला आहे.

इराणच्या सरकारी वृत्तसंस्थेने प्रसिद्ध केलेल्या एका व्हिडिओमध्ये, हजारो लोक मृत विद्यार्थिनींच्या अंत्यसंस्कारासाठी एकत्र आल्याचे दिसत आहे. दुःख त्यांच्या चेहऱ्यावर स्पष्टपणे दिसत आहे. पुरुष लोकही धाय मोकलून रडताना दिसत आहेत. यावेळी काहींच्या हातात सर्वोच्च नेते अयातुल्लाह अली खामेनेई यांचे फोटो, तर काहींच्या हातात इराणचा राष्ट्रध्वज दिसत आहे.

२८ फेब्रुवारीला झाला होता हा भीषण हल्ला -हा भीषण हल्ला शनिवार, २८ फेब्रुवारी रोजी दक्षिण इराणमधील मिनाब शहरातील 'शाजारेह तैबेह' या मुलींच्या प्राथमिक शाळेवर झाला होता. आंतरराष्ट्रीय कायद्यानुसार, कोणत्याही शिक्षण संस्था, रुग्णालय किंवा सार्वजनिक ठिकाणांवर जाणीवपूर्वक हल्ला करणे हा 'युद्ध गुन्हा' (War Crime) मानला जातो.

कबरींचा फोटो शेअर परराष्ट्र मंत्र्यांचा ट्रम्प यांच्यावर निशाणा -इराणचे परराष्ट्र मंत्री सय्यद अब्बास अराघची यांनी सोशल मीडिया प्लॅटफॉर्म 'X'वर मुलींना दफन करण्यासाठी खोदल्या जात असलेल्या सामूहिक कबरींचा फोटो शेअर करत संताप व्यक्त केला आहे. त्यांनी या घटनेला 'कोल्ड ब्लडेड मर्डर' असे म्हटले आहे. 

अराघची यांनी लिहिले, "अमेरिका-इस्रायली बॉम्बस्फोटात मारल्या गेलेल्या १६० हून अधिक निष्पाप तरुणींसाठी या कबरी खोदल्या जात आहेत. त्यांच्या शरिराचे तुकडे-तुकडे करण्यात आले. मिस्टर ट्रम्प यांनी ज्या "बचावा"चे वचन दिले होते, ते प्रत्यक्षात असे दिसते. गाझापासून मिनाबपर्यंत निष्पापांच्या निर्घृण हत्या करण्यात आल्या."