भुवनेश्वर, हॉकी विश्वचषक स्पर्धा: बेल्जियमने उपांत्यपूर्व फेरीत जर्मनीवर २-१ असा विजय मिळवला. या विजयासह बेल्जियमने उपांत्य फेरीत प्रवेश केला आहे.
जर्मनीच्या डिटर लिनेकोगेलने सामन्याच्या १४व्या मिनिटाला पहिला गोल करत संघाला आघाडी मिळवून दिली होती. पण ही आघाडी जर्मनीला टिकवता आली नाही. त्यानंतर बेल्जियमच्या अॅलेक्सझँडर हेनरीक्सने सामन्याच्या १८व्या मिनिटाला गोल करत जर्मनीशी १-१ अशी बरोबरी केली.
दोन्ही संघांची १-१ अशी बरोबरी बराच काळ कायम होती. दोन्ही संघांकडून आक्रमण होत होते, पण त्यांचे बचावही उत्तम होत होते. पण अखेर सामन्याच्या ५०व्या मिनिटाला बेल्जियमला गोल करण्यात यश आले. टॉम बूनने ५०व्या मिनिटाला निर्णायक गोल केला.