जिल्हा मध्यवर्ती बँकेसाठी आज मतदान

परभणी जिल्हा मध्यवर्ती बँकेच्या २१ जागांसाठी निवडणूक कार्यक्रम जाहीर झाला होता. यापैकी सात जागा बिनविरोध निवडून आल्या आहेत. यात पाच परभणी जिल्ह्यातील तर हिंगोली जिल्ह्यात दोन जागा आहेत. हिंगोलीत आ. तानाजी मुटकुळे हे बिनविरोध आले होते. तर, सेनगावमध्ये राजेंद्र देशमुख यांचा अर्ज अवैध ठरल्याने माजी आ. साहेबराव पाटील बिनविरोध निवडून आले आहेत. वसमत, औंढा व कळमनुरी तालुक्यात मतदान होणार आहे. शिवाय इतर मागास, महिला, भटक्या विमुक्त आदी प्रवर्गांच्या उमेदवारांसाठी सर्वच तालुक्यांमध्ये मतदान होणार आहे. आज प्रचाराचा शेवटचा दिवस होता. त्यामुळे अनेकांची लगबग दिसत होती. शेवटच्या टप्प्यातही सहलीवर न गेलेल्या मतदारांना गळाला लावण्याचा प्रयत्न सुरू होता. या निवडणुकीत आ. सुरेश वरपूडकर व माजी आ. रामप्रसाद बोर्डीकर यांच्या गटात रस्सीखेच दिसत आहे. काही ठिकाणी निवडणुकीला पक्षीय झालर असली, तरी काही ठिकाणी मात्र संबंधावर भर असल्याचे दिसत आहे. त्यातच लक्ष्मीअस्त्र प्रभावी ठरणार असून मतदारसंख्या कमी असल्याने चांगलाच भाव चढलेला दिसत आहे. यात अनेक जण एकासोबत सहलीवर गेल्यानंतरही दुसऱ्या उमेदवाराच्या संपर्कात असल्याचा प्रकारही दिसून येत आहे. त्यामुळे जास्त मतदार सहलीवर नेल्यानंतर आपण सेफ झाल्याची भावना बाळगणाऱ्यांनाही मतदानाचा निकाल समोर येईपर्यंत याच भ्रमात राहावे लागणार असल्याचे दिसत आहे. २३ मार्च रोजी मतमोजणी असून याच दिवशी सगळे कळणार आहे.