हिंगोली : सेनगाव तालुक्यातील साखरा येथील दुहेरी खुनाचा उलगडा करणाऱ्या पोलीस कर्मचाऱ्यांना रिवार्ड देणार असल्याची माहिती पोलीस अधीक्षक एम. राकेश कलासागर यांनी ११ एप्रिल रोजी पत्रकार परिषदेत दिली. यावेळी सहाय्यक पोलीस अधीक्षक यतीश देशमुख, उपविभागीय पोलीस अधिकारी विवेकानंद वाखारे यांची उपस्थिती होती.
सेनगाव तालुक्यातील साखरा येथील भारजाबाई मारोती इंगळे यांचा दोन दिवसापूर्वी खून करून मृतदेह अर्धवट अवस्थेत पुरल्याबाबत उघडकीस आले होते. यापूर्वीही मनकर्णाबाई तुळशीराम सरूळे यांचा खून झाल्याची घटना घडली होती. खुनाच्या दोन घटना घडल्याने पोलिसांसमोर तपासाचे आव्हान उभे होते. त्यामुळे पथके स्थापन करून तपासाच्या सूचना दिल्या होत्या. यामध्ये स्थागुशाचे पो.नि. उदय खंडेराय, सेनगाव पो.नि. कृष्णदेव पाटील, सपोनि दीक्षा लोकडे, अभय माकणे, स्थागुशाचे पो.उप.नि. शिवसांब घेवारे, बालाजी बोके, विलास सोनवणे, संभाजी लेकूळे, भगवान आडे, विठ्ठल कोळेकर, किशोर कातकडे, राजूसिंग ठाकूर, शंकर ठोंबरे, ज्ञानेश्वर सावळे, किशोर सावंत, विठ्ठल काळे, ज्ञानेश्वर पायघण, आकाश टापरे, खंदारे यांचा समावेश होता.
या पथकाने सर्वच बाजूंनी तपास करीत खुनाचा उलगडा करत आरोपी दिलीप आंबादास लाटे यास ताब्यात घेतले. दोन्ही खुनाचा उलगडा करणाऱ्या पोलीस कर्मचाऱ्यांना रिवार्ड देण्यात येणार असल्याचे ते म्हणाले. दरम्यान, जिल्ह्यात इतरही खुनाच्या घटनेतील आरोपी लवकरच पोलिसांच्या हाती लागतील, असा विश्वासही कलासागर यांनी व्यक्त केला.