कळमनुरी ( हिंगोली ) : हिंगोली - नांदेड मुख्य रस्त्यावर आयटीआय जवळ एका मोटारसायकलला अज्ञात वाहनाने धडक दिल्यामुळे मोटारसायकलवरील दोघे मित्र ठार झाल्याची घटना ४ जानेवारी रोजी रात्री १२ वाजेच्या सुमारास घडली आहे.
कळमनुरी येथील शेख फैजान शेख उमर फारूक ( २२ ) , उमेर कुरेशी (१८ ) हे दोघे मोटरसायकलने माळेगाव येथून चहा पिऊन कळमनुरीकडे येत होते. आयटीआयजवळ ते आले असता, त्यांच्या वाहनाला विना क्रमांकाच्या अज्ञात वाहनाने जोराची धडक दिली. यात शेख फैजान, उमेर कुरेशी हे दोघे गंभीर जखमी झाले.
या अपघाताची माहिती मिळताच, काही युवक व त्यांचे नातेवाईक घटनास्थळी पोहचले. त्यांना कळमनुरी उपजिल्हा रुग्णालयात आणले असता, शेख फैजान यांना डॉक्टरांनी तपासणी करून मृत घोषित केले. तर उमेर कुरेशी हा गंभीर जखमी असल्याने उपजिल्हा रुग्णालयात प्राथमिक उपचार करून पुढील उपचारासाठी नांदेड येथे पाठविण्यात आले. नांदेड येथे जात असताना अर्धापूर येथे त्याचाही मृत्यू झाला.
या घटनेचा पोहेका. माधव भडके, गुलाब जाधव यांनी पंचनामा केला. दोन्ही मृतदेहाचे शवविच्छेदन करण्यात आले. मृत शेख फैजान हा आई-वडिलांना एकटाच होता. या दोघावर ५ जानेवारी रोजी शोकाकुल वातावरणात दफनविधी करण्यात आला.