हिंगोली : कोरोनामुळे मागील वर्षभरापासून शाळा, महाविद्यालये बंद आहेत. नवीन शैक्षणिक सत्र १४ जूनपासून सुरू होणार आहे. मात्र याही वर्षी कोरोनामुळे शाळा कधी सुरू होतील, हे सांगणे कठीण आहे. सध्याची स्थिती पाहता कोरोना लसीकरणानंतरच शाळा सुरू होतील, असा अंदाज व्यक्त केला जात आहे. दुसरीकडे विद्यार्थी, पालक व शिक्षकांना शाळा सुरू होण्याची प्रतीक्षा आहे.
मागील वर्षभरापासून प्राथमिक शाळा बंदच आहेत. मोजकेच दिवस माध्यमिक व उच्च माध्यमिक शाळेचे वर्ग भरले होते. त्यामुळे शाळा, महाविद्यालयांनी ऑनलाइन शिक्षणावरच भर दिला होता. अखेरीस आरटीई अंतर्गत सर्व विद्यार्थ्यांना परीक्षा न घेताच उत्तीर्ण करण्याचा निर्णय घेण्यात आला. २ मे ते १३ जूनपर्यंत उन्हाळी सुट्टी जाहीर झाली आहे. त्यामुळे १४ जूनपासून नवीन शैक्षणिक सत्र सुरू होईल. मात्र सध्या कोरोनाचा संसर्ग वाढला आहे. कोरोना संसर्ग कमी करण्यासाठी शासन विविध प्रतिबंधात्मक उपाययोजना करीत आहे. त्याचाच भाग म्हणून कोरोना लसीकरण मोहीम हाती घेतली आहे. सर्वांचे लसीकरण झाल्यास कोरोनाला आळा बसेल, असा विश्वास शासनाला आहे. विद्यार्थ्यांचेही लसीकरण झाल्यास शाळा सुरू करण्याचा मार्ग मोकळा होईल. मात्र, त्या वेळची कोरोना संसर्ग व लसीकरणाची स्थिती पाहूनच शाळा सुरू करण्याचा निर्णय घेतला जाईल, असे मत शिक्षण तज्ज्ञ व्यक्त करीत आहेत.
२२ हजार विद्यार्थी थेट दुसरीत
- कोरोनामुळे २०२०-२१ या शैक्षणिक वर्षात प्राथमिक शिक्षण घेणाऱ्या सर्वच विद्यार्थ्यांना परीक्षा न घेताच आरटीई अंतर्गत उत्तीर्ण करण्याचा निर्णय घेण्यात आला.
- जिल्ह्यातील २२ हजार ८५२ विद्यार्थी पहिलीत शिक्षण घेत होते. हे सर्व विद्यार्थी आता थेट दुसरीत गेले आहेत.
- शाळा सुरू झाल्यानंतर या विद्यार्थ्यांना मोफत पुस्तके देण्याचे नियोजन शिक्षण विभागाला आखावे लागणार आहे.
- हे विद्यार्थी थेट दुसरीत गेले असले तरी एकही दिवस शाळेत गेले नाहीत. त्यामुळे हे विद्यार्थी दुसरीत गेले तरी शाळेत पहिल्यांदाच जाणार आहेत.
शिक्षण तज्ज्ञ म्हणतात...
सध्या लहान मुलांना कोरोना होत असल्याचे वैद्यकीय तज्ज्ञ सांगत आहेत. कोरोना संसर्गाची अशीच स्थिती राहिल्यास शाळा सुरू करताना सर्वच बाजूंनी विचार करावा लागणार आहे. त्या वेळची कोरोना स्थिती पाहूनच शिक्षण विभाग निर्णय घेईल, असेही शिक्षण तज्ज्ञ सांगत आहेत.
विद्यार्थी, पालक, शिक्षकही शाळेसाठी उत्सुक!
विद्यार्थी प्रतिक्रिया...
मागील वर्षी काही दिवसच शाळेत जाता आले. ऑनलाइन अभ्यास घेतला जात होता. मात्र वर्गात शिक्षकांनी शिकविलेले जास्त लक्षात राहते. त्यामुळे शाळा लवकर सुरू कराव्यात.
- ऋतुराज वाढवे, विद्यार्थी
या वर्षी शाळा सुरू झाल्यास पाल्याला शाळेत नक्कीच पाठविणार. वर्षभरापासून मुले घरीच आहेत. त्यामुळे घरात राहून ती कंटाळली आहेत. मुले एकलकोंडी होण्याचीही भीती वाटत आहे.
- रवी गंगावणे, पालक
शाळा तर सुरू व्हायलाच हव्यात. मात्र कोरोना लसीकरण मोहिमेवरही बरेच काही अवलंबून आहे. सध्या तरी जुनी पुस्तके परत घेणे, टी.सी. तयार करणे आदी कामे सुरू आहेत.
- संतोष खंदारे, प्राथमिक शिक्षक