नवी दिल्ली : कोरोनाच्या ओमायक्रॉन या नवीन व्हेरिएंटबाबत जास्तीत जास्त माहिती गोळा करण्यासाठी शास्त्रज्ञ अहोरात्र प्रयत्न करत आहेत. स्टडीद्वारे या व्हेरिएंटबाबत नवनवीन गोष्टी समोर येत आहेत. ओमायक्रॉन व्हेरिएंटवर आता हाँगकाँग युनिव्हर्सिटीची नवीन स्टडी आली आहे.
या स्टडीमधील निष्कर्ष पाहता ओमायक्रॉनबाबत चिंता वाढवणारी आहेत. मात्र, या नवीन व्हेरिएंटमुळे लोक फारसे गंभीर आजारी पडत नाहीत, ही दिलासादायक बाब आहे. दक्षिण आफ्रिकेच्या डॉक्टरांकडून मिळालेल्या डेटावर केलेल्या स्टडीनुसार, ओमायक्रॉन व्हेरिएंट डेल्टा आणि मूळ कोरोना स्ट्रेनच्या तुलनेत जवळपास 70 पट वेगाने संक्रमित करतो. मात्र, गंभीर आजार खूपच कमी असण्याची शक्यता आहे.
स्टडीत काय म्हटले आहे? संसर्गाच्या 24 तासांनंतर ओमायक्रॉन श्वसन प्रणालीमध्ये खूप वेगाने पसरतो, असे स्टडीत आढळून आले आहे. संशोधकांच्या टीमचे म्हणणे आहे की, आपल्या मूळ स्वरूपाच्या तुलनेत कोरोनाचा नवीन व्हेरिएंट ओमायक्रॉन फुफ्फुसाच्या ऊतींमध्ये 10 पट कमी प्रतिकृती बनवतो, जो 'कमी तीव्र' असल्याचे दर्शवते. स्टडीनुसार, ओमायक्रॉन एका व्यक्तीपासून दुसऱ्या व्यक्तीपर्यंत वेगाने पसरतो. परंतु फुफ्फुसाच्या ऊतींना त्याच्या पूर्वीच्या व्हेरिएंटइतके नुकसान होत नाही.
दरम्यान, जरी हा व्हायरस स्वतः कमी रोगजनक असला तरीही अनेक लोकांना संक्रमित करून, एक अतिशय संसर्गजन्य व्हायरस अधिक गंभीर आजार आणि मृत्यूस कारणीभूत ठरू शकतो, असे स्टडीचे प्रमुख लेखक चॅन म्हणाले. लस आणि पूर्वीच्या संसर्गापासून मिळालेल्या प्रतिकारशक्तीपासून सुद्धा ओमायक्रॉन संरक्षण करू शकतो. त्यामुळे तो धोकादायक असण्याचीही शक्यता आहे.
शास्त्रज्ञ अजूनही त्याच्या संसर्गाचा दर शोधण्याचा प्रयत्न करत आहेत. दक्षिण आफ्रिकेत प्रथम आढळून आल्यानंतर तीन आठवड्यांच्या आत, हा व्हेरिएंट किमान 77 देशांमध्ये पसरला आहे. ओमायक्रॉनच्या रुग्णांवर उपचार करणारे डॉक्टर असेही म्हणतात की, आतापर्यंतचे बहुतेक संक्रमण सौम्य आहेत आणि रुग्णांना रुग्णालयात दाखल करण्याची आवश्यकता नाही. बरेच संशोधक अशी शक्यता देखील व्यक्त करत आहेत की, जास्त म्युटेट होणारे व्हेरिएंट्स इतर स्ट्रेनना देखील जन्म देऊ शकतात. यामुळे, महामारी हळूहळू कमकुवत होईल आणि मर्यादित राहील आणि जग त्याबरोबर जगायला शिकेल.
सावधगिरी महत्त्वाचीओमायक्रॉनच्या सुरूवातीच्या डेटावरून असे दिसून आले आहे की, बऱ्याच रुग्णांना ऑक्सिजनची आवश्यकता नाही किंवा त्यांना आयसीयूमध्ये दाखल केले जात नाही. काही लोकांमध्ये पुन्हा संसर्गाची प्रकरणे देखील आढळून येत आहेत, जी फार गंभीर नाहीत. मात्र, अनेक आरोग्य तज्ज्ञ आणि जागतिक आरोग्य संघटना लोकांना सावधगिरी बाळगण्याचा, गर्दीच्या ठिकाणांपासून दूर राहण्याचा, योग्य प्रकारे मास्क लावण्याचा आणि स्वच्छतेची पूर्ण काळजी घेण्याचा सल्ला देत आहेत.