कोरोनानंतर भारतीयांची निपाह व्हायरसने (Nipah virus) झोप उडविली आहे. अद्याप हा व्हायरस केरळमध्येच असला तरीदेखील आजुबाजच्या कर्नाटक, तामिळनाडू राज्यांमध्ये काळजी घेतली नाही तर पसरण्यास वेळ लागणार नाही. महत्वाचे म्हणजे निपाह व्हायरसचा स्वॅब हा पुण्याच्या लॅबमध्ये पाठवावा लागतो. जी चूक कोरोनाकाळात झाली ती आता होणार नाहीय. आता यापुढे एका तासातच निपाह व्हायरसची लागण झालीय की नाही याची माहिती मिळणार आहे. (Truenat test kit gets emergency use approval from DCGI for Nipah virus)
निपाह व्हायरसच्या वाढत्या धोक्यावर भारताच्या हाती मोठे शस्त्र लागले आहे. ड्रग कंट्रोलर ऑफ इंडियाने गोव्याची कंपनी मोल्बियो डायग्नोस्टिकच्या टेस्ट किटला आपत्कालीन परवानगी दिली आहे. ट्रूनेट नावाच्या या टेस्ट किटद्वारे एका तासात रिझल्ट येणार आहे. हे टेस्ट किट आरटीपीसीआर प्लॅटफॉर्मवर आधारित आहे. निपाह व्हायरसचा शोध घेणारे हे पहिले टेस्ट किट आहे.
ट्रूनेट पूर्णपणे स्वदेशी आणि बॅटरीवर चालणाऱ्या आरटीपीसीआर प्लॅटफॉर्मवर आधारित आहे. याच्या माध्यमातून जवळपास 30 रोगांची तपासणी केली जाऊ शकते. तसेच तासाभरात याचे रिझल्ट येतात. या किटमुळे टीबी, कोरोना, डेंग्यू, चिकनगुनिया, हिपॅटायटीस, एचपीवी सारख्या रोगांची तपासणी केली जाऊ शकते.
मोल्बियोचे सीटीओ चंद्रशेखर नायर यांनी सांगितले की, हे टेस्ट किट ब्रिफकेसमध्ये ठेवून कुठेही नेता येऊ शकते. हे किट आंतरराष्ट्रीय बाजारातही लाँच करण्यात आले आहे. त्याचे पेटंटही करण्यात आले आहे. कमी काळाच्या प्रशिक्षणानंतरदेखील हे किट वापरता येईल, असे डिझाईन करण्यात आले आहे. निपाह व्हायरसचा पहिला रग्ण 2001 मध्ये सिलीगुडीमध्ये आढळला होता. त्यानंतर 2007 मध्ये पश्चिम बंगाल आणि 2018 मध्ये केरळच्या कोझिकोडमध्ये आढळला होता.