- मृण्मयी पगारेआयुष्यभर तरूणच दिसता आलं तर? ही तर प्रत्येकाचीच इच्छा. पण ती पूर्ण करणं हे कुठे आपल्या हातात आहे? आपल्याला कितीही तरूण दिसावं असं वाटत असलं तरी काळ आपलं काम करतोच. न थांबता टिकटिकणारं घड्याळ, रोज उगवणारा सूर्य थोडीच कोणाला धरून ठेवता येतो? मग कसं कोणी कायम तरूणच दिसेल?असं वाटत असलं तरी जीवनात अशा 14 गोष्टी आहेत ज्या आपण नियमित पाळल्या तर वयाचा आकडा कोणताही असो आपण कायम तरूणच दिसू हे नक्की!आणि अशा नैसर्गिक तारूण्यासाठी ब्युटी पार्लरमध्ये जाण्याची किंवा ढीगभर कॉस्मेटिक्स आणि लोशन वापरण्याची गरज नाही. रोजच्या जगण्यात 14 नियम पाळा आणि कायम तरूण दिसा!कायम तरूण ठेवणारे 14 नियम
1) आपलं वय सगळ्यात आधी दाखवतात ते आपले केस. केस कायम मऊ, मुलायम आणि काळेभोर दिसावे असं वाटत असेल तर आधी केसांना तापवणं थांबवायला हवं. ड्रायरनं केस कोरडे करणं, केस कुरळे करण्यासाठी कर्लिंग आर्यन, मशिननं केस स्टे्रट करणं हे प्रकार केसांच्या बाबतीत करू नये. या गोष्टी केसांपासून चार हात दूर ठेवल्या तर केसांचं आरोग्य कायम चांगलं राहातं. 2) SPF हा घटक असलेलं क्रीम चेहेऱ्यासाठी नियमित वापरावं. SPF या घटकामुळे त्वचेला आवश्यक ते पोषण मिळतं. आणि अती नील किरणांपासून त्वचेची रक्षा होते. आठवड्यातून किमान तीन ते चार वेळा SPF असलेलं क्रीम वापरणाऱ्यांच्या चेहेऱ्यावर सुरकुत्या पडत नाही असं अभ्यास सांगतो. SPF 30 डर्मेटॉलॉजिस्टचं मान्यताप्राप्त क्रीम आहे. 3) हातापायांची त्वचाही वयाबद्दल खूप काही सांगून जाते. म्हणूनच हातापायाच्या त्वचेला न चुकता मॉश्चरायझर मिळणं गरजेचं असतं. तरचं हातापायाच्या त्वचेचा मऊपणा आणि चमक टिकून राहाते. रोज सकाळी आंघोळीनंतर मॉश्चरायझर लावणं म्हणूनच गरजेचं आहे. डर्मेटॉलॉजिस्टनं SPF 30 मॉश्चरायझर वापरण्याचा आग्रह केला आहे.
4) दातांना डाग पाडणारे अन्न्नपदार्थ, पेयं सेवन करू नये. डार्क चॉकलेट, हॉट चॉकलेट, अति थंड पेयं, सॉसेस, सोया सॉसेस यांचं अति प्रमाणातलं सेवन दातांचं आरोग्य खराब करतं. अति प्रमाणात रेड वाइन पिणं, कॉफी घेणं या सवयी दात खराब करतात. म्हणून त्यांचं सेवन थांबवावं. 5) अमेरिकन सोसायटी आॅफ प्लॅस्टिक सर्जन यांनी केलेल्या अभ्यासानुसार नुसता चेहरा नाही तर बोटांची नखंही तुमचं वय दाखवतं. नखं कायम सुंदर दिसण्यासाठी त्यांना चांगल्या प्रतीची नेलपॉलिश नियमित लावावी. 6) व्यायामानं शरीरातील रक्तप्रवाह सुधारतो. त्वचेच्या आरोग्यासाठी तर सुदृढ रक्तप्रवाह कायमच महत्त्वाचा असतो. व्यायामानं रक्तप्रवाहासोबतच शरीराचा बांधाही कायम सुडौल राहतो. आणि तुम्ही जेव्हा सुडौल दिसता तेव्हा आपोआपच तुम्ही कोणत्याही वयात सुंदरच दिसता. म्हणूनच रोज 30 मीनिटं व्यायाम गरजेचा आहे.
7) आहारातल्या मीठाकडे कायम लक्ष असू द्यावं. अती खारट पदार्थ खाऊ नये. मीठामुळे शरीरात पाणी साचून राहातं. आणि त्यामुळे शरीरावर सूज दिसते. अति मीठामुळे आपण लवकर वयस्कर दिसतो. 8) कायम तरूण आणि छान दिसायचं असेल तर स्मार्ट फोन जरा बेतानंच वापरावा. अति स्मार्ट फोनचा वापर आपलं बॉडी पोश्चर खराब करतं. स्मार्ट फोन पाहताना, हाताळताना मान खाली घातलेली असते. आणि जितक्या वेळ फोन वापराल तेवढावेळ ती खाली असते. एकतर यामुळे मानेचे आजार उदभवतात आणि मानेभोवती वळ्या पडून मानेचं सौंदर्य लय पावतं. त्यामुळे स्मार्ट फोन कमी वापरलेला बरा. आणि जेव्हा तो वापरू तेव्हा तो आरशासारखा चेहेऱ्यासमोर धरून वापरावा.
9) तोंडातले दात जर लवकर खराब झाले तर तुम्ही वयानं कितीही तरूण असला तरी तुम्ही तरूण मात्र दिसत नाही. यासाठी दातांचं आरोग्य चांगलं ठेवणं आवश्यक आहे. माऊथवॉशनं तोड धुणं ही चांगली सवय आहे. त्यामुळे दात कायम चांगले राहतात. दातात अडकलेले कण माऊथवॉश वापरल्यानं वेळीच निघून जातात. त्यामुळे दात किडत नाही. हिरड्या खराब होत नाही. यासाठी अल्कोहोल फ्री माऊथवॉशनं खुळुखुळु गुळण्या कराव्यात. 10) वयपरत्वे डोक्यावरचे केस कमी होतात. पण हे अर्धसत्य आहे. तुमच्या आहारात जर प्रोटिनचं प्रमाण योग्य असेल तर वय वाढलं तरी डोक्यावरील केस दाट आणि मजबूत राहतात. आपल्या आहारात नियमित प्रोटीन असले तरी केसांची निर्मिती चांगली होते. म्हणूनच रोजच्या आहारात 46 ग्रॅम प्रोटिन गरजेचं मानलं जातं. 11) ओल्या केसांची निगा जर नीट घेतली नाही तरीही केस खराब होवून ते वयाच्या फार आधीच पातळ होतात. त्यामुळे ओले केस कंगव्यानं खराखरा विंचरू नये. 12) हिरव्या भाज्या या नैसर्गिक टूथब्रशचं काम करतात. हिरव्या भाज्या खाल्ल्यानं दात कायम स्वच्छ राहातात. पालक, लेट्यूस, ब्रोकोली, मेथी, तांदुळका यासारख्या हिरव्या भाज्यांमुळे त्वचेचा पोत आणि कांती सुधारते. वय वाढलं तरी त्वचा ही चमकत राहाते.