चित्रकला स्पर्धा : बालकांच्या कुंचल्यातून उधळले विविध रंग
गोंदिया : रंग आणि रेषांच्या माध्यमातून अभिव्यक्त होणार्या थोर चित्रकारांची मोठी परंपरा महाराष्ट्राला लाभली आहे. महाराष्ट्रीय शैलीच्या चित्रकारांची कलेची अनेक दालन समृध्द केली आहे. याच अनुषंगाने लोकमत बाल विकस मंच व स्पार्क अप अॅकेडमी (किडस् क्लब) च्या वतीने चित्रकला स्पर्धेचे आयोजन नुकतेच स्थानिक सुभाष बागेत मोठ्या उत्साहात पार पडले. कलाकाराची पहिली ओळख त्याच्या कलाकृतीतून होण्यासारखा दुसरा आनंद नसतो. व्यक्तीची थेट ओळख होण्यापूर्वी तिच्या अदाकारीचा परिचय झाला तर त्या व्यक्तिमत्त्वाचे सगळे कंगोरे हळूहळू लक्षात येऊ लागतात. ती व्यक्ती जर चित्रकार असेल तर त्याचा रेखा आणि रंग आधी बोलतात आणि मग ती व्यक्ती आपल्या मनचक्षुंसमोर आकार घेऊ लागते. याचाच प्रत्यय या चित्रकला स्पर्धेच्या निमित्ताने आला. प्रत्येक स्पर्धक आपल्या हाती रंगरंगोटीचे साहित्य घेऊन चित्रकला स्पर्धेत हात अजमावीण्यासाठी बागेत एकच गर्दी केली होती. मुलांना कागद, पेन्सील, रंगपेटी आणि स्केचपेन उघडून देण्यापासून तर नेटकेपणाने चित्र काढण्याच्या सूचना देण्यापर्यंत आई-बाबांचीची लगबग सुभाष बागेत दिसून येत होती. सदर चित्रकला स्पर्धा दोन गटात वर्ग ३ ते ६ व वर्ग ७ ते १० वीपर्यंत घेण्यात आली. स्पर्धेत जिल्ह्यातील विविध शाळेतून विद्यार्थ्यानी मोठ्या प्रमाणावर सहभाग दर्शविला होता. स्पर्धकांसोबत पालकांनीही बागेत एकच गर्दी केली होती. पहिल्या गटातील विद्यार्थ्यांसाठी चित्र रंगवा आणि दुसर्या गटातील विद्यार्थ्यांसाठी आईचे महत्व, पर्यावरण आणि माझ्या स्वप्नातील जग या विषयावर स्पर्धा घेण्यात आली. या स्पर्धेत शेकडो विद्यार्थ्यानी भाग घेऊन स्पर्धेला मोठा प्रतिसाद दिला. यावेळेस किड्स क्लबचे धर्मराज काळे आणि कार्यालय प्रमुख प्रशांत मिश्रा, बाल विकास मंच जिल्हा संयोजक श्रीकांत पिल्लेवार, युवा नेक्स्ट जिल्हा संयोजिका दिव्या भगत, सखी मंच संयोजिका दीपा भौमिक, संतोष बिलोने, प्रमोद गुडधे, रुपेश डोंगरे उपस्थित होते. स्पर्धेच्या यशस्वीतेसाठी राजेश फ्रान्सीस, आतिष देशभ्रतार, डी.बी.चौरे, संतोष कडव, महेश सोनी, विजय मेंढे, पंकज खैरे, स्वाती डोळस, रूचीका जैन, कृतिका अग्रवाल, योगीता शाहू, इशा दोषी यांनी सहकार्य केले. चित्रकला स्पर्धेचा निकाल लवकरच लोकमत व लोकमत समाचार वृत्तपत्रात प्रकाशित केला जाणार आहे. (प्रतिनिधी)