नरेश रहिले
गोंदिया : गडचिरोलीनंतर गोंदिया जिल्हा शंभर टक्के दारूबंदी होण्याच्या मार्गावर आहे. गोंदिया जिल्ह्यातील १६ पोलीस ठाण्यांच्या घेतलेल्या आढाव्यानुसार १,१०१ गावांपैकी ८१० गावांमध्ये दारूबंदी करण्यात आल्याची माहिती पुढे आली आहे. त्यामुळे दारूबंदी संदर्भात जिल्ह्यातील तंटामुक्त समित्या व महिला मंडळी किती सजग आहेत, याची प्रचिती येते.
दुर्धर आजारामुळे एकाच व्यक्तीचा मृत्यू होतो. परंतु दारूमुळे दारू पिणाऱ्यांचे अख्खे कुटुंब उद्ध्वस्त होते. यासाठी दारूविरोधात एल्गार पुकारण्यात महिला मंडळी अग्रेसर असतात. गावागावात दारूविरोधात महिलांनी मोहीम छेडली आहे. ग्रामपंचायत प्रशासनावर दबाव टाकून दारूबंदी न केल्यास तुम्हाला निवडणुकीत सहकार्य करणार नाही, अशी भूमिका देखील महिला मंडळी घेत आहे. परिणामी आपली मते खराब होणार नाहीत याची काळजी घेत दोन-चार दारूविक्रेत्यांच्या विरोधात समीकरण तयार करून गावात दारूबंदीसाठी ठराव घेण्याचा प्रयत्न करतात.
गोंदिया जिल्ह्यातील १६ पोलीस ठाण्यांतर्गत येणाऱ्या छोट्या-मोठ्या १,१०१ गावांपैकी ८१० गावांमध्ये दारूबंदी केल्याची बाब पुढे आली आहे. महाराष्ट्र शासनाने महात्मा गांधी तंटामुक्त गाव मोहिमेच्या शासन निर्णयात गावातील अवैध धंदे करणाऱ्यांचे धंदे बंद पाडून त्यांना सन्मानाच्या रोजगाराकडे वळविण्याच्या सूचना दिल्या आहेत. अवैध धंदे म्हणजे दारूला आपल्या गावातून हद्दपार करण्याचा मानस महिलांनी बांधला. दारू विकणाऱ्यांचे धंदे बंद करून त्यांना गावात सुरू होणाऱ्या रोजगार हमी योजनेच्या कामावर प्राधान्य देण्यात आले आहे.
आर्थिक बचत; कलह कमी
दारूमुळे पैशाची नासाडी होते, गृहकलह वाढतात. यामुळे महिलांनी दारूबंदीसाठी पुढाकार घेतल्याने ८१० गावांतील दारूबंदी करण्यात आली. त्यामुळे या गावातील दारू पिणाऱ्या व्यक्तींची पैशांची बचत झाली. दारूबंदी झाल्याने वादही कमी झाले. दारूबंदीमुळे गावातील वातावरण आता सुधारत आहे. मद्यप्राशन करून गावातील चौकाचौकात धिंगाणा घालणाऱ्यांनी मंदिराची वाट धरल्याचे आशादायी चित्र निर्माण झाले आहे.