देवरी (गोंदिया) : येथील एका परीक्षा केंद्रावर बारावी भौतिकशास्त्राचा पेपर लीक होऊन सर्व प्रश्न उत्तरांची झेरॉक्स प्रत लोकमतच्या हाती लागली आहे. बारावी परीक्षेदरम्यान केंद्रावर सर्रास कॉपी सुरू असल्याचा सोमवारी (दि.१७) उघडकीस आला. या प्रकारामुळे काॅपीमुक्त अभियानाचा फज्जा उडाल्याचे चित्र आहे.
साेमवारी (दि.१७) बारावी विज्ञान शाखेचा भौतिकशास्त्राचा पेपर होता. शहरातील एका केंद्रावर त्याच शाळेतील एक विद्यार्थी बारावीचा पेपर देत असताना त्याला हा प्रकार आढळून आला. त्याने लोकमत प्रतिनिधीला नाव न सांगण्याच्या अटीवर केंद्रावर मिळालेली झेरॉक्स प्रत दिली. झेरॉक्स कॉपीवर एकूण नऊ प्रश्नांची उत्तरे लिहिलेली आढळली. यावरून प्रश्नसंच बाहेर गेलाच कसा व त्याची उत्तरे सोडवून झेरॉक्स सेंटरवर केंद्रावर आली कशी असा प्रश्न उपस्थित केला जात आहे. या प्रकारात केंद्रावर अधिनस्त असलेले शिक्षक सामील तर नाहीत ना असा संशय नागरिकांकडून व्यक्त केला जात आहे. तर हुशार विद्यार्थ्यांचे यामुळे नुकसान होत असल्याचे बोलले जात आहे. तर दुसरीकडे शिक्षण विभागाचे भरारी पथक तसेच महसूल विभागाचे भरारी पथक हातावर हात धरून बसले असल्याचे चित्र देवरी शहरात पाहावयास मिळत आहे. या प्रकारामुळे आता तरी शिक्षण विभागाने जागे होऊन सर्व केंद्रांवर धाडी टाकून योग्य ती कारवाई करण्याची मागणी होत आहे.
शिक्षण विभाग म्हणतो, असा प्रकार घडलाच नाही
या संदर्भात गटशिक्षणाधिकारी महेंद्र माेटघरे व उपशिक्षणाधिकारी ज्ञानेश्वर दिघोरे यांच्याशी संपर्क साधला असता त्यांनी एकाही केंद्रावर असा कुठलाच प्रकार घडला नसल्याचे सांगितले. तसेच या प्रकारात कुठलेच तथ्य नसल्याचे सांगितले. तर देवरी येथील काही जागरूक नागरिकांनी नागपूर येथील उपसंचालकांकडे तक्रार केल्याची माहिती आहे.