कामांना निधी मिळत नसल्याने खासदारांची नाराजी; सभागृहात खाली बसून व्यक्त केली नाराजी

सूचविलेल्या कामांना निधी मिळत नसल्याची तक्रार : पालकमंत्र्यांकडून मनधरणी

गोंदिया : विरोधी पक्षातील खासदारांनी सुचविलेल्या कामासाठी वांरवार मागणी करुन सुध्दा निधी मिळत नाही, जर निधीच मिळत नसेल तर जिल्हा नियोजन समितीच्या बैठकीला उपस्थित राहयचे तरी कशाला अशी नाराजी व्यक्त करीत भंडारा-गोंदिया लोकसभा क्षेत्राचे खा. डॉ. प्रशांत पडोळे यांनी मंगळवारी (दि.२०) जिल्हा नियोजन सभागृहात आयोजित बैठकीत चक्क सभागृहात खाली बसले. या प्रकाराने सभागृहात गोंधळ उडाला होता. अखेर पालकमंत्री इंद्रनील नाईक यांनी निधी देण्याचा शब्द दिल्यानंतर खा.पडोळे मंचावर येऊन बसले.

जिल्ह्याचे पालकमंत्री इंद्रनील नाईक यांच्या उपस्थितीत मंगळवारी जिल्हाधिकारी कार्यालयातील नियोजन भवनात जिल्हा नियोजन समितीची बैठक आयोजित करण्यात आली होती. या बैठकीला जि.प.अध्यक्ष लायकराम भेंडारकर, खा.डॉ. प्रशांत पडोळे, आ.डॉ. परिणय फुके, ॲड. अभिजीत वंजारी, विनोद अग्रवाल, राजकुमार बडोले, संजय पुराम, जिल्हा परिषदेचे सदस्य, जिल्हाधिकारी प्रजित नायर, जि.प. मुख्य कार्यकारी अधिकारी एम. मुरुगानथम, पोलीस अधीक्षक गोरख भामरे, नवेगाव नागझिरा व्याघ्र राखीव प्रकल्प उपसंचालक प्रीतमसिंग कोडापे, उपवनसंरक्षक पवनकुमार जोंग, नियोजन उपायुक्त अनिल गोतमारे, जिल्हा नियोजन अधिकारी मुरलीधर वाडेकर व सर्व विभागांचे विभाग प्रमुख उपस्थित होते. 

बैठकीला सुरुवात झाल्यानंतर मंचावर बसलेेले खा.डॉ. प्रशांत पडोळे यांनी मी सुचविलेल्या कामांना निधी मिळत नाही. आमच्या कामांना निधी मिळणार नसेल तर आम्ही सभागृहात उपस्थित तरी कशाला राहयचे, आम्ही सूचविलेल्या कामाला निधी मिळणार की असा सवाल पालकमंत्री इंद्रनील नाईक यांना केला. मात्र त्यांना समाधानकारक उत्तर न मिळाल्याने ते नियोजन समितीच्या बैठकीच्या मंचावरून सभागृहात खाली गेले व जमिनीवर बसले. यानंतर पालकमंत्र्यांनी त्यांना निधी देऊ असा शब्द दिल्यानंतर ते पुन्हा बैठकीच्या मंचावर जाऊन बसले. खा. पडोळे यांच्या या कृतीमुळे नियोजन समितीच्या सभागृहात काही वेळ गोंधळ उडालेला होता.