खासदार दत्तक गावातील डिजिटल शाळा

झेडपीच्या प्राथमिक शाळा म्हणजे उपहास आणि उपेक्षेच्या धनी. नशीबी कायम चणचण, ओसाड आणि सगळ्यांची दूषणे.

ठळक मुद्देउपक्रमांचा बोलबाला : एका अबोल क्रांतीची डिजिटल कहाणीअध्यक्ष करतात स्वयंपाकीचे काम

दिलीप चव्हाण।ऑनलाईन लोकमतगोरेगाव : झेडपीच्या प्राथमिक शाळा म्हणजे उपहास आणि उपेक्षेच्या धनी. नशीबी कायम चणचण, ओसाड आणि सगळ्यांची दूषणे. या सर्व बाबींना बाजूला सारत खासदार दत्तक ग्राम भुताईटोलाच्या झेडपी शाळेने डिजिटल शाळा तयार केली. येथील दोन शिक्षकांनी आपल्या शाळेचा सरकारी नक्षाच बदलून टाकला आहे.भुताई टोला (पाथरी) जिल्हा परिषद डिजिटल प्राथमिक शाळा सन २०१५ मध्ये डिजिटल झाली. पाच वर्षांपासून १०० टक्के प्रगत शाळा, सुसज्ज शालेय परिसर व सोबतच २०० मोठी झाडे, मूल्यवर्धन उपक्रम, ज्ञान रचनावादी शाळा या बाबी शाळेच्या जमेच्या बाजू आहेत.शाळा डिजिटल करण्यासाठी लोकवर्गणीच्या माध्यमातून एक लाख ३५ हजार लोकवर्गणी झाली आणि लोकसहभागातून वीज बिल भरले जाते.येथे श्रमदानातून वाचन कुटी तयार करण्यात आली. वाचनकुटीच्या भोवताली तारेवर विविध प्रकारच्या पुस्तका, शालेय परिसरातील विविध झाडांवर विद्यार्थ्यांनी आपल्या नावे लावलेले फलक या बाबी सरकारी शाळेसाठी नवल वाटणाऱ्या आहेत.शिक्षण हक्क कायद्यामुळे भुताईटोला शाळेत बरेच बदल झाले. शालेय व्यवस्थापन समित्यांनी गणवेश बदलले. टाय, बुट व आयकार्ड अशा कडक पोशाखात झेडपी शाळांतील मुलेही भलतीच रुबाबदार दिसतात. हा बदल भुताईटोला वासीयांना सुखावणारा होता. संगणक आल्यानंतर शाळेचे रूपच बदलले.गरजेइतके फर्निचर या शाळेत आहे. संगणक-प्रोजेक्टरच्या माध्यमातून माहिती तंत्रज्ञानाचा वापर व लोकसहभाग नावाच्या गोष्टीने येथील गावकरी शाळेशी जुळलेले आहे. गावकºयांच्या श्रमदानातून झाडांना पाणी देणे, वाचन कुटीची डागडुजी करणे आदी सर्व कामे भुताईटोलावासी स्वयंप्रेरणेने करतात.यातून भुताईटोला येथील जिल्हा परिषद डिजिटल शाळेचा नावलौकिक वाढत गेला. गावातल्या झेडपीच्या शाळेतील विविधांगी उपक्रमांचा बोलबाला होऊ लागला तशी पालकांनी कॉन्व्हेंटमधून मुले काढली आणि पुन्हा गावातल्या जिल्हा परिषद शाळेत घातली. भुताईटोला शाळेत यावर्षी १६ विद्यार्थ्यांनी प्रवेश घेत नवा इतिहास रचला. येथील दुसरी, तिसरी व चौथीची मुुले संगणक हाताळतात. दुसरीचे विद्यार्थी गुणाकार, वजाबाकी करून इंग्रजी वाचतात. येथील शाळा व्यवस्थापन समितीच्या सहकार्याने २०१५-१६ मध्ये असलेली विद्यार्थी संख्या दुप्पट झाली आहे. आजघडीला या शाळेत २९ विद्यार्थी शिक्षण घेत आहेत.या शाळेचे मुख्याध्यापक माणिक शामलाल शरणागत, सहायक शिक्षक मुकेश अंबादे, शाळा व्यवस्थापन समिती सदस्य सविता रहांगडाले, देविलाल पटले, कुवरलाल भोयर यांच्या देखरेखीत शाळेचा कारभार चालतो.या शाळेच्या पटसंख्या वाढीसाठी शिक्षणमंत्री विनोद तावडे यांनी मुख्याध्यापक शरणागत यांचा गौरव केला आहे. तर प्रगत शैक्षणिक महाराष्ट्र कार्यक्रमात जिल्ह्यातून द्वितीय क्रमांकाचा मान या शाळेला मिळाला आहे.भुताईटोला (पाथरी) खासदार दत्तक ग्राम योजनेत समाविष्ट आहे. प्रफुल्ल पटेलांच्या प्रेमापोटी या गावाचा व शाळेचा विकास झाला आहे. आमच्या गावातील विद्यार्थी शिक्षणात पुढे कसे जातील, त्या दिशेने प्रयत्न सुरु आहेत.केवलराम बघेले,सदस्य, पंचायत समिती, पाथरी.विद्यार्थ्यांसाठी प्रोजेक्टर आणि संगणकाचा उत्तम वापर सुरू आहे. गुणवत्ता हिच आमची मालमत्ता, यासाठी आम्ही मेहनत करतो. पालक व शाळा व्यवस्थापन समितीच्या सहकार्याने नवनव्या प्रयोगातून प्रगत शाळेकडे आमची वाटचाल सुरू आहे.माणिक शरणागत,मुख्याध्यापक, जि.प. शाळा, भुताईटोलाअध्यक्ष करतात स्वयंपाकीचे कामभुताईटोला येथील जि.प. शाळेत शाळा व्यवस्थापन समितीच्या अध्यक्ष डिलेश्वरी प्रितमलाल कटरे बीए,डीएड उच्चशिक्षित असतानाही सेवाभावी वृत्तीतून शाळेत स्वयंपाक करतात. कटरे यांनी स्वयंस्फुर्तीने विनामानधन तीन वर्षांपासून अध्यापनाचे काम हाती घेतले आहे. सकाळी स्वयंपाक करणे व नंतर मुलांना शिकविणे, असा डिलेश्वरी कटरे यांचा नित्यक्रम आहे. शाळेच्या स्वयंपाकासाठी हजार रुपयांत परवडत नाही म्हणून तीन वर्षांपूर्वी एका महिलेने शाळेतील काम सोडले. शासकीय धोरणाला खिळ बसू नये म्हणून डिलेश्वरी कटरे यांनी स्वयंपाक करण्याचे काम हाती घेतले. उच्चशिक्षित असून कोणतेही काम लहानमोठे होत नाही. या भावनेतून स्वत:च्या आत्मीक समाधानासाठी व मुलांच्या प्रगतीसाठी शाळेत काम करीत असल्याचे कटरे यांनी ‘लोकमत’ला सांगितले.