बोगस डॉक्टरांचा सुळसुळाट वाढला
सालेकसा : सध्या बदलत्या वातावरणामुळे सर्दी, खोकला, अंगदुखी व ताप यासारख्या आजारांचे प्रमाण वाढले आहे. शिवाय गावांमध्ये डासांचा प्रादुर्भाव वाढला असून त्यामुळे बोगस डॉक्टरांची चांदी आहे.
मोकाट जनावरांमुळे वाहतुकीस अडथळा
तिरोडा : शहरातील रस्त्यांवर मोकाट जनावरांचा ठिय्या राहत असल्याने वाहतुकीला अडथळा निर्माण होत आहे. मात्र, याकडे नगरपरिषदेचे दुर्लक्ष होत असल्याने नागरिकांना त्रास होत आहे. मोकाट जनावरांमुळे बाजारपेठेत जास्तच त्रास असून वाहतूक विस्कळीत होते. ही जनावरे पकडण्याची मोहीम राबविण्याची मागणी होत आहे.
लक्ष लागले आता नुकसान भरपाईकडे
केशोरी : ऑक्टोबर महिन्याच्या सुरुवातीला झालेल्या परतीच्या पावसाने आणि तुडतुडा, करपा, खोडकिडा या कीडरोगांनी खरीप हंगामातील धान पिकाची नासाडी झाली. शेतकऱ्यांच्या हातातोंडाशी आलेला घास निसर्गाच्या अवकृपेने हिरावून घेतला. कृषी विभागाने झालेल्या नुकसानीची पाहणी करून पंचनामे केले आणि मदत मिळण्याचे प्रस्ताव जिल्हाधिकारी यांच्याकडे पाठविले आहेत. आर्थिक कोंडीत सापडलेल्या शेतकऱ्यांचे लक्ष शासनाकडून मिळणाऱ्या नुकसान भरपाईकडे लागले आहे.
शेंडा परिसरात नेटवर्कची समस्या
सडक -अर्जुनी : तालुक्यातील ग्राम कन्हारपायली, शेंडा, आपकरीटोला, उशिखेडा, पाटीलटोला, लेंदिटोला, मोहघाटा, दल्ली, लेंडीटोला, हलबीटोला, पांढरी, सिंदिपार, सलाईटोला, मुशानझोरवा या गावांत टॉवर नसल्याने ग्राहकांची अडचण होते.
स्मशान शेड केव्हा तयार करणार ?
मुंडीकोटा : नवेगाव (खुर्द) येथे बऱ्याच वर्षांपासून स्मशान शेड नाही. त्यामुळे पावसाळ्याच्या दिवसांत मृतदेहावर अंत्यसंस्कार करण्याची मोठी अडचण निर्माण होते. त्यामुळे शेड उभारण्याची मागणी होत आहे.
कलावंतांना मानधनास आताही विलंबच
गोंदिया : ५० वर्षे वय झाले की, शासनाकडून वृद्ध कलावंत मानधन योजनेचा लाभ कलाकाराला मिळतो, पण गेल्या काही महिन्यांपासून समाजकल्याण समिती गठित नसल्याने मानधनास विलंब होत आहे.
कचरापेट्या कचऱ्याने बरबटलेल्या
नवेगावबांध : स्वच्छ भारत अभियानांतर्गत कचरा इतरत्र पडून राहू नये, यासाठी चौकाचौकांत कचरापेट्या बसविण्यात आल्या. मात्र, त्यांची नियमित सफाई होत नसल्याने त्या बरबटलेल्या आहेत.
योग्य लाभार्थी घरकुलापासून वंचित
मुंडीकोटा : घोगरा परिसरात घरकुलांचा लाभ मिळावा, असे अनेक गरजू अजूनही प्रतीक्षेत आहेत. घर कोसळण्याच्या अवस्थेत असूनही ते लाभापासून वंचित आहेत.
बोदलकसा-बिर्सी फाटा रस्ता अर्धवट
सुकडी- डाकराम : नक्षलग्रस्त, आदिवासीबहुल व जंगलव्याप्त क्षेत्र म्हणून ओळखल्या जाणाऱ्या या क्षेत्रातील रस्त्याचे काम ३ वर्षांपासून अर्धवट असल्याने रस्त्यावर अनेक अपघात घडले आहेत. मात्र, तरीही या रस्त्याकडे प्रशासन व राजकीय नेत्यांचे दुर्लक्ष आहे, असा आरोप परिसरातील जनता करीत आहे. तिरोडा येथील सार्वजनिक बांधकाम विभागांतर्गत बोदलकसा ते बिर्सी फाटा या मुख्य रस्त्याचे खडीकरण, रुंदीकरण व डांबरीकरणाचे काम ३ वर्षांपासून सुरू आहे; पण हा ९-१० किमी. अंतराचा रस्ता अजूनपर्यंत अर्धवट आहे.
रासायनिक भाज्यांमुळे आजारांत वाढ
सालेकसा : शेतकरी रासायनिक खतांचा वापर करीत असल्यामुळे सुपीक शेतीवर परिणाम होऊ लागला आहे. शेतीत अधिक उत्पन्न घेण्याकरिता रासायनिक खतांसोबत दिवसेंदिवस महागड्या कीटकनाशकांचा वापर होऊ लागला आहे. यामुळे रासायनिक भाज्यांमुळे आजाराच्या संख्येत मोठी वाढ झाली आहे.