ग्रामसेवकांना ‘शो कॉज’

विविध मागण्यांसाठी २ जुलैपासून कामबंद आंदोलनावर असलेल्या ग्रामसेवकांना ‘शो कॉज’ नोटीस देण्यात आली आहे. जिल्हा परिषद मुख्य कार्यकारी अधिकारी यांच्या आदेशावरून पंचायत समिती

गोंदिया : विविध मागण्यांसाठी २ जुलैपासून कामबंद आंदोलनावर असलेल्या ग्रामसेवकांना ‘शो कॉज’ नोटीस देण्यात आली आहे. जिल्हा परिषद मुख्य कार्यकारी अधिकारी यांच्या आदेशावरून पंचायत समिती खंडविकास अधिकाऱ्यांनी गुरूवारी ही नोटीस दिल्याची माहिती आहे. यामुळे आंदोलनात सहभागी जिल्हयातील सुमारे ३३५ ग्रामसेवक अडचणीत येण्याचे चित्र दिसून येत आहे. ग्रामसेवक व ग्रामविकास अधिकारी यांची वेतन त्रुटी दूर करणे, ग्राम पंचायत स्तरावर नरेगासाठी स्वतंत्र यंत्रणा निर्माण करणे, २० ग्राम पंचायतींमागे एक विस्तार अधिकारी पद निर्माण करणे यासह अन्य मागण्यांसाठी ग्रामसेवकांचे २ जुलै पासून राज्यस्तरावर आंदोलन सुरू आहे. या आंदोलनांतर्गत जिल्ह्यातील सुमारे ३३५ ग्रामसेवक सहभागी असून त्यांनी ग्राम पंचायतला कुलूप ठोकून कक्ष अधिकाऱ्यांना चाब्या दिल्या होत्या. यामुळे ग्राम पंचायतींचे कामकाज विस्कटल्याने नागरिकांची ओरड सुरू होती. ही बाब लक्षात घेत जिल्हा परिषद मुख्य कार्यकारी अधिकारी यांनी पंचायत समिती खंडविकास अधिकाऱ्यांना ग्रामसेवकांना त्यांच्या या कृत्याबद्दल कारणे दाखवा नोटीस देण्याचे आदेश दिले होते. त्यांच्या या आदेशावरून खंडविकास अधिकाऱ्यांनी आंदोलनावर असलेल्या ग्रामसेवकांना नोटीस पाठविल्याची माहिती आहे. त्यामुळे आता आंदोलनात सहभागी असलेल्या ग्रामसेवकांवर काय कारवाई होते याकडे सर्वांचे लक्ष लागले आहे. याबाबत ग्रामसेवक संघाचे जिल्हा अध्यक्ष कार्तिक चव्हाण यांच्याशी संपर्क साधला असता त्यांनीही नोटीस देण्यात आल्याचे सांगीतले. तर संघटनेचे तालुकाध्यक्ष रूद्रकार यांच्याशी संपर्क साधला असता त्यांनी सध्या बाहेर असून अद्याप पत्र मिळाले नसल्याचे सांगितले. (शहर प्रतिनिधी)