कपिल केकत, गोंदिया : शहरातील बाजारातील लोहा लाईनमधील रेडिमेड कपड्यांच्या दुकानाला आग लागल्याची घटना शुक्रवारी (दि. २२) पहाटे ६:२० वाजेदरम्यान घडली. यामध्ये कपडे व फर्निचर जळून राख झाले.
बाजारातील लोहा लाईनमध्ये दीपक हरिराम मूलचंदानी यांचे रेडिमेड कापडाचे दुकान आहे. त्यांच्या दुकानाला आग लागली. हा प्रकार शुक्रवारी (दि. २२) पहाटे ६:२० वाजेदरम्यान गोपाल अग्रवाल यांच्या लक्षात आल्याने त्यांनी अग्निशमन विभागाला माहिती दिली. माहितीच्या आधारे अग्निशमन विभागाच्या पथकाने लगेच घटनास्थळ गाठून आगीवर नियंत्रण मिळविले. मात्र तोपर्यंत दुकानातील कपडे व फर्निचर जळून गेले होते. या घटनेत आग कशी लागली व किती नुकसान झाले हे वृत्त लिहीपर्यंत कळू शकले नाही. ही कारवाई शिफ्ट इन्चार्ज मुकेश माने, फायरमन शहबाज सय्यद, राहुल नागपुरे, वीरेंद्र नागपुरे, वाहनचालक लोचन कावडे यांनी पार पाडली.