नरेश रहिले
गोंदिया : रावणवाडी पोलिस ठाण्यांतर्गत ग्राम घिवारी येथील संदीप बैद्यनाथ तुरकर (३२) व कुलदीप बैद्यनाथ तुरकर (२८) या दोघा भावंडांंच्या खुनाचा प्रयत्न करणाऱ्या दोघांवर गुन्हा दाखल करण्यात आला आहे.
१० ऑगस्ट रोजी रात्री ८.३० वाजता कुलदीप तुरकर गावातील तिरसेन बिसेन व भास्कर गौतम यांच्या सोबत बोलत होते. यावेळी आरोपी विजय कांतीलाल सुलाखे (२९) व त्यांचा पुतण्या शिवम चिमनलाल सुलाखे (२६, रा. शंकरटोली-घिवारी) त्यांच्या घरासमोर आले व त्यांनी ट्रॅक्टरने कट मारल्याच्या कारणावरून कुलदीप सोबत भांडण केले. तसेच शिवीगाळ करून त्यांना धमकी देत उभारीने मारून खुनाचा प्रयत्न केला. संदीप तुरकर हा कुलदीप तुरकर याला सोडविण्यासाठी आला असता आरोपींनी त्याच्याही डोक्यावर उभारीने मारून गंभीर जखमी करून दोघांच्या खुनाचा प्रयत्न करण्यात आला.
आरोपी विजय सुलाखे व शिवम सुलाखे दोघांवर ११ ऑगस्ट रोजी भादंविच्या कलम ३०७, ३२४, ५०४, ५०६, ३४ अन्वये गुन्हा दाखल करण्यात आला आहे. दुसऱ्या गटातील आरोपी संदीप तुरकर व कुलदीप तुरकर दोघांनी विजय सुलाखे व शिवम सुलाखे दोघांना उभारीने मारून गंभीर जखमी केले. त्या दोघांवर भादंवि कलम ३२४, ५०४, ५०६, ३४ अन्वये गुन्हा दाखल करण्यात आला आहे. तपास सहायक पोलिस निरीक्षक बाबासाहेब सरवदे करीत आहेत.