गोंदिया : नगर परिषद कर्मचारी सोसायटीमधील वादाला घेऊन सोसायटीमध्ये कार्यरत एका कर्मचाऱ्याने सोसायटी संचालक व प्रभारी अग्निशमन अधिकाऱ्याला मारहाण केल्याची घटना गुरूवारी (दि.५) सायंकाळी ७ वाजतादरम्यान घडली.
प्राप्त माहितीनुसार येथील नगर परिषद कर्मचारी सोसायटीमध्ये लेखापाल पदावर कार्यरत मुकेश नायक व सचिव राजा नायक यांच्यात आपसी वाद आहे. यातच मुकेश नायक यांनी सोसायटीमध्ये यापुर्वीही काही वाद घातला होता व त्यावर त्याला २० फेब्रुवारी रोजी कामावरून कमी करण्यात आले. यावर त्याने गुरूवारी (दि.५) दुपारी सोसायटीमधील सर्व कर्मचाºयांना बाहेर काढून सोसायटी कार्यालयाला कुलूप ठोकले.
यावर सोसायटी संचालक व प्रभारी अग्निशमन अधिकारी लोकचंद भेंडारकर पोलिसांत तक्रार देण्यासाठी गेले होते. यावर नायक याने सायंकाळी ७ वाजतादरम्यान अग्निशमन कार्यालयात जाऊन भेंडारकर यांना संचालक पदाचा राजीनामा देण्यास सांगत धक्काबुक्की केली. तसेच भेंडारकर पोलिसांत तक्रार देण्यास आले असता तेथे त्यांना मारहाण केल्याचे भेंडारकर यांनी लोकमतशी बोलताना सांगीतले. प्रकरणी मुकेश नायक तसेच भेंडारकर यांनी एकमेकांविरोधात तक्रार दिल्याची माहिती आहे. या प्रकरणाला घेऊन शुक्रवारी (दि.६) नगर परिषद कार्यालय बंद राहणार अशा चर्चा सुरू होत्या.