गोंदिया : आम्हाला नकली सोने विक्री करून फसवणूक करता असे म्हणत तिघा तरुणांना बेदम मारहाण करीत किशोर चुन्नीलाल राठौर (३० ) रा. गोंडीटोला, कटंगीकला याचा खून करणाऱ्या आरोपींवर रावणवाडी पोलिसांनी गुन्हा दाखल केला आहे. १८ सप्टेंबर रोजी दुपारी ३ वाजेच्या सुमारास डांगोर्ली येथे किशोर राठौरसह तीन तरुणांना बेदम मारहाण करीत मध्य प्रदेशात नेले. त्यांच्याकडून खंडणी मागून एकाचा जीव देखील घेतला. या प्रकरणात तब्बल ३१ आरोपी असल्याची खमंग चर्चा आहे. परंतु, रावणवाडी पोलिस आतापर्यंत फक्त १६ आरोपींची नावे स्पष्ट करू शकली. त्यातीलही आरोपींना अद्याप अटक करण्यात यश आले नाही.
१८ सप्टेंबर रोजी दुपारी ३ वाजता डांगोर्ली येथे किशोर चुन्नीलाल राठौर (३०) रा. गोंडीटोला, कटंगीकला ता. जि. गोंदिया, संदीप मदनलाल ठकरेले (२३) व देवदीप राजेंद्र जैतवार (१८) रा. हनुमान मंदिरचे मागे, गोंडीटोला, कटंगीकला ह्या तिघांना बेदम मारहाण केली. ते तिघेही १८ सप्टेंबर रोजी दुपारी ३ वाजता मोटारसायकलने किशोर राठौर यांच्याकडे असलेला नकली सोन्याचा झुमर विकण्याकरिता डांगोर्ली येथे गेले होते. आम्हाला नकली सोने विक्री करून आमची फसवणूक करता असे बोलून आरोपींनी त्या तिघांना मारपीट करून जबरीने आपल्या मोटारसायकलवर बसवून मध्य प्रदेशच्या डोंगरगाव येथे नेले. देवदीप जैतवार याच्या जवळील ५ हजार रुपये बळजबरीने हिसकावून घेतले. काठीने बेदम मारहाण केल्यामुळे यात किशोर राठौर याचा मृत्यू झाला. या घटनेसंदर्भात रावणवाडी पोलिसांनी आरोपींवर भादंविच्या कलम ३०२, ३६४, ३८६, ३४१, १४३, १४४, १४४, १४७, १४८, १४९, ३२३, ५०४, ५०६ अन्वये गुन्हा दाखल केला. या मारहाण करणाऱ्या आरोपींत ३१ जणांचा समावेश असल्याची विश्वसनीय माहिती आहे. यात १६ आरोपींची नावे स्पष्ट झाली आहेत.
आरोपी ओमप्रकाश खिलेश्वर चौधरी (१८), अशोक ठाकरे (४०), अजय तुरकर (३५), शुभम ऊर्फ राजू दीपचंद ठाकरे (२३), आलोक बिसेन (२४, सर्व रा. कोसते, वाराशिवनी) यांना १९ सप्टेंबर रोजी अटक करण्यात आली होती. त्यानंतर रोहित भोरगडे (२८) व विजय भोरगडे (३५) या दोघांना २५ सप्टेंबर रोजी तर २७ सप्टेंबर रोजी दीपक भोरगडे (२६) व राजू क्षीरसागर (२५) या दोघांना अटक करण्यात आली. त्या नऊ आरोपींना न्यायालयाने भंडारा येथील तुरूंगात रवानगी केली आहे. पोलिसांना स्पष्ट झालेल्या नावांपैकी अजूनही सात आरोपी मोकाटच आहेत.
मध्य प्रदेशातील तो जि.प.सदस्य कोण?
नकली सोने विक्रीच्या नावावर तरुणाला बेदम मारहाण करून त्याचा खून करणाऱ्या आरोपींच्या बचावासाठी मध्य प्रदेशातील एक जि.प. सदस्याने रावणवाडी पोलिस ठाणे गाठले. आपला तोरा दाखवून त्याने आरोपींची नावे कमी करण्यासाठी दबाव तंत्राचा वापर केला. त्या दबावतंत्राला रावणवाडी पोलिस बळी पडत असल्याची चर्चा आहे. या घटनेला १३ दिवस होत असताना फक्त नऊ आरोपींना अटक करण्यात आली आहे.
अटक करण्यामागील अर्थ काय?
खुनाच्या आरोपींना अटक करण्यासाठी रावणवाडी पोलिस गंभीर नसल्याचे दिसते. रावणवाडी येथील पोलिसांना आरोपींची माहिती असताना त्यांना अटक न करण्यामागील अर्थ काय? पोलिस अधीक्षकांनी याकडे लक्ष देण्याची गरज आहे. ३१ आरोपी असल्याचा कांगावा होत असताना १६ आरोपी पोलिसांनी दाखविले. त्यात त्यांना अटकही करण्यात आली नाही. या पोलिसांवर कुणाचा दबाव तर नाही अशी शंका व्यक्त केला जात आहे.
मिळतोय आरोपींना पुरावे गोळा करायला वेळ
या प्रकरणात समाविष्ट असलेले आरोपी त्या ठिकाणी नाहीत हे दाखविण्यासाठी आपण एखाद्या कार्यक्रमात होतो, दुसऱ्या ठिकाणी होतो असे बोगस पुरावे गोळा करण्याच्या तयारीत असल्याचे समजते. त्या आरोपींना अभयदान देणारे कोण याचा तपास करणे गरजेचे आहे.