२.२७ लाख विद्यार्थ्यांनी ऐकले मोदींचे भाषण

विद्यार्थ्यांशी टिव्ही, इंटरनेट यांच्या माध्यमातून प्रत्यक्ष संवाद साधून शिक्षक दिनी पंतप्रधान नरेंद्र मोदी यांचे भाषण विद्यार्थ्यांनी ऐकावे यासाठी ...

गोंदिया : विद्यार्थ्यांशी टिव्ही, इंटरनेट यांच्या माध्यमातून प्रत्यक्ष संवाद साधून शिक्षक दिनी पंतप्रधान नरेंद्र मोदी यांचे भाषण विद्यार्थ्यांनी ऐकावे यासाठी मनुष्यबळ विकास मंत्रालयाने २७ आॅगस्ट रोजी महाराष्ट्र शासनाला पत्र पाठविले. तर दुसऱ्याच दिवशी प्राथमिक शिक्षक संचालनालय पुणे यांनी २८ आॅगस्ट रोजी राज्यातील प्रत्येक जिल्ह्यात पंतप्रधानांचे भाषण ऐकविण्याची व्यवस्था करावी, असे पत्र पाठविले. त्यामुळे जिल्ह्यातील १६४० पैकी १६०७ शाळांमध्ये पंतप्रधानांचे भाषण टिव्ही, रेडिओ, इंटरनेटच्या माध्यमातून दाखविण्यात आले. यात दोन लाख २६ हजार ९५८ विद्यार्थी तर आठ हजार ८७५ शिक्षकांनी पंतप्रधानांचे भाषण ऐकले. गोंदिया तालुक्यातील ३९० शाळांमधील ७८ हजार ५५९ विद्यार्थी व तीन हजार २७ शिक्षकांनी पंतप्रधानांचे भाषण ऐकले. यात २०५ शाळांमध्ये टिव्हीवर तर १८५ शाळांमध्ये रेडीओवर भाषण ऐकण्यात आले. तिरोडा तालुक्यातील २०२ शाळांमधील २८ हजार ७८५ विद्यार्थी व एक हजार २९९ शिक्षकांनी पंतप्रधानांचे भाषण ऐकले. या तालुक्यात सर्वशाळांमध्ये टिव्ही संच बसविण्यात आले होते. गोरेगाव तालुक्यातील १५५ शाळांपैकी १५३ शाळांमध्ये भाषण ऐकविण्यात आले. यात २१ हजार ४६१ विद्यार्थी, ६५० शिक्षकांनी भाषण ऐकले. येथे १४४ टिव्ही तर नऊ रेडीओ वापरण्यात आले. दोन शाळांमध्ये भाषण ऐकले गेले नाही. आमगाव तालुक्यातील १५१ शाळांमधील २० हजार ५७१ विद्यार्थी व ७९० शिक्षकांनी टिव्हीवर भाषण ऐकले. सालेकसा तालुक्यातील १५२ पैकी १४० शाळांमध्ये भाषण ऐकविण्याची व्यवस्था करण्यात आली. त्यात १० हजार १२५ विद्यार्थी तर ५३० शिक्षकांनी सहभाग घेतला होता. ६२ शाळांमध्ये टिव्ही तर ७८ शाळांमध्ये रेडीओची व्यवस्था करण्यात आली होती. नक्षलग्रस्त भागातील १२ शाळांमध्ये पंतप्रधानांचे भाषण ऐकले गेले नाही. देवरी तालुक्यातील २०४ शाळांपैकी २०२ शाळांमध्ये भाषण ऐकविण्यात आले. यात २१ हजार ३४८ विद्यार्थी, ९६९ शिक्षकांनी भाषण ऐकले. या तालुक्यातील दोन नक्षलग्रस्त गावातील शाळांमध्ये भाषण ऐकण्यात आले नाही. २०२ शाळांमध्ये टिव्ही संच बसविण्यात आले होते. सडक/अर्जुनी तालुक्यातील १७२ पैकी १६० शाळांमध्ये भाषण ऐकण्याची व्यवस्था करण्यात आली होती. यात १८ हजार ४२५ विद्यार्थी, ६५० शिक्षकांनी भाषण ऐकले. या तालुक्यातील नक्षलग्रस्त असलेल्या १२ शाळांमध्ये भाषण ऐकण्यात आले नाही. १६० शाळांमध्ये टिव्ही संच बसविण्यात आले होते. अर्जुनी/मोरगाव तालुक्यातील २१४ शाळांपैकी २०९ शाळांमध्ये भाषण ऐकण्याची सोय करण्यात आली होती. त्यात २७ हजार ६८४ विद्यार्थी, ९६० शिक्षक सहभागी झाले होते. १९४ शाळांमध्ये टिव्हीची सोय तर १५ शाळांमध्ये रेडीओची सोय करण्यात आली होती. पाच शाळांमध्ये पंतप्रधानांचे भाषण ऐकले गेले नाही. जिल्ह्यातील १६४० शाळांपैकी १६०७ शाळांमध्ये पंतप्रधान नरेंद्र मोदी यांचे भाषण ऐकविण्यात आले. यात दोन लाख २६ हजार ९५८ विद्यार्थ्यांनी तर आठ हजार ८७५ शिक्षकांनी सहभाग घेतला. यापैकी एक हजार ३२० शाळांमध्ये टिव्ही तर २२० शाळांमध्ये रेडीओचा वापर करण्यात आला होता. विशेष म्ह़णजे फक्त ३३ शाळांनी पंतप्रधानांचे भाषण विद्यार्थ्यांना एकता यावी याची सोय केली नसल्याचे कळले. जिल्ह्यातील दोन लाख ६१ हजार १०६ विद्यार्थ्यांपैकी दोन लाख २६ हजार ९५८ विद्यार्थ्यांनी विविध माध्यमांतून देशाचे पंतप्रधान नरेंद्र मोदी यांचे भाषण ऐकले. तर ३४ हजार १४८ विद्यार्थी पंतप्रधानांच्या भाषणाला गैरहजर होते. जिल्ह्यातील शाळांमध्ये टिव्ही आणि रेडीओ कुणी भाड्याने घेतले, कुणी पाटलाघरुन आणले, एखाद्या शिक्षकाने स्वत:च्या घरचा टिव्ही उचलून नेला तर कुठे सरपंचाला विनंती करून टिव्हीची सोय करण्यात आल्याचे दिसून आले. (तालुका प्रतिनिधी )