मालामाल कॅसिनोवाले सरकारचे २१ कोटी देणार कधी? दोन कंपन्यांवर कारवाई

विधानसभेत लेखी माहिती

लोकमत न्यूज नेटवर्क, पणजी : गोव्यातील कॅसिनो व्यवसायातून राज्य सरकारला मोठ्या प्रमाणात महसूल मिळत असला तरी काही कॅसिनो कंपन्यांकडून अजूनही तब्बल २१ कोटी ५ लाख रुपयांची थकबाकी येणे बाकी असल्याचे स्पष्ट झाले आहे. २०२१-२२ ते २०२५-२६ या पाच वर्षाच्या कालावधीत कॅसिनोंकडून सरकारला एकूण १,७४९ कोटी ३२ लाख रुपयांचा महसूल प्राप्त झाला, अशी माहिती मुख्यमंत्री प्रमोद सावंत यांनी गोवा विधानसभेत लेखी उत्तराद्वारे दिली.

उत्तरात नमूद केलेल्या माहितीनुसार, राज्यात एकूण २३ कॅसिनो असून यातील १७ जमिनीवर व ६ कॅसिनो हे पाण्यामध्ये आहेत. या जमिनीवरील कॅसिनोपैकी 'बिग बी लेजर' या कॅसिनो कंपनीकडून १४ कोटी रुपये येणे बाकी आहे तर 'रॅफल्स स्क्वेअर डेव्हलपमेंट' या कंपनीच्या कॅसिनोंकडून ७ कोटी ५० लाख रुपये थकबाकी आहे.

सरकारकडील थकबाकीच्या प्रकरणात रॅफल्स स्क्वेअर डेव्हलपमेंट या कंपनीला २ मार्च २०२६ रोजी कारणे दाखवा नोटीस बजावण्यात आली आहे.

बिग बी लेजरचा परवाना निलंबित

दुसऱ्या प्रकरणात सरकारने बिग बी लेजर या कंपनीचा कॅसिनो परवाना निलंबित केला आहे. यासंदर्भात ८ डिसेंबर २०२५ रोजी आदेश जारी करण्यात आला होता. यानंतर १७फेब्रुवारी २०२६ रोजी उत्तर गोवा जिल्हाधिकाऱ्यांना कॅसिनो परिसर सील करण्याचे निर्देश देण्यात आले होते.

त्यानुसार संबंधित कॅसिनो परिसर सध्या सील करण्यात आला आहे. थकबाकी वसूल करण्यासाठी आवश्यक ती पुढील कारवाई करण्यात येणार असून ती जमीन महसुलाच्या थकबाकीप्रमाणे वसूल करण्यात येईल, अशी माहिती संबंधित खात्याकडून देण्यात आली आहे.

वर्ष	मिळालेला महसूल (कोटीमध्ये)
२०२१-२२	१८६ कोटी ३५,५७,३९३
२०२२-२३	३५३ कोटी ७८,४४,१४१
२०२३-२४	६०३ कोटी ७६,७१,५५६
२०२४-२५	४६१ कोटी ७१,१५,१९१
२०२५-२६	१४३ कोटी ७०,५५,६२६
एकूण	१७४९ कोटी ३२,४३,९०७