‘त्या’ लुटारूंना अटक

मडगाव : संपूर्ण गोव्यात चोर्‍या व घरफोड्यांचे प्रमाण वाढलेले असताना दक्षिण गोव्यात वाटमारी करणार्‍या तसेच पर्यटकांना व प्रवाशांना लुटणार्‍या तिघांना पोलिसांनी अटक केली आहे. यापैकी एक चोरटा अट्टल गुन्हेगार असून त्याच्या फरार साथीदाराच्या शोधातही पोलीस आहेत. तीन वेगवेगळ्या प्रकरणांत या तिघांना अटक करण्यात आल्याची माहिती द. गोव्याचे पोलीस अधीक्षक विजय सिंग यांनी दिली. पकडण्यात आलेले तिघेही चोरटे बिगर गोमंतकीय असून यापैकी सद्दाम खुदनावर याला मडगाव पोलिसांनी, ज्ञानेश्वर नाईक याला कोलवा पोलिसांनी तर मारुती गायकवाड याला कोकण रेल्वे पोलिसांनी अटक केली आहे. पहिल्या प्रकरणात सद्दाम खुदनावर व त्याचा फरार साथीदार अन्वर शेख यांनी घोगळ हाउसिंग बोर्ड येथील महमद खुर्शीद शेख (३२) या टेलरला आपल्या मोटरसायकलवरून लिफ्ट देऊन रामनगरीच्या डोंगराळ भागात नेऊन लुटले होते. या चोरट्याच्या केलेल्या वर्णनावरून घोगळ हाउसिंग बोर्ड येथे राहाणारा खुदनावर (२३) या संशयिताला पोेलिसांनी ताब्यात घेतले. यापूर्वी आणखी दोन घरफोड्यांमध्ये त्याचा हात असल्याचे तपासात पुढे आल्याचे सिंग यांनी सांगितले. दुसरा साथीदार अन्वर शेख हा फरार असून आतापर्यंत अन्वरचा घरफोड्या व इतर प्रकारच्या एकूण दहा गुन्ह्यांत हात असल्याचे उघडकीस आले आहे. मडगावचे पोलीस निरीक्षक सुदेश नाईक, उपनिरीक्षक विश्वजित चोडणकर, हवालदार सुभाष नाईक, विकास कौशिक तसेच पोलीस शिपाई गोरखनाथ गावस व शम्मीर नगनुरी यांनी कारवाई केली. दुसरी घटना २६ मे रोजी बाणावली येथे घडली होती. सायंकाळी ६.३0 वाजता बाणावलीच्या कोकनट हट येथे राहाणारा जोनाथन सेच्युयर हा आॅस्ट्रियाचा पर्यटक आपली मैत्रीण अ‍ॅना मारिया ब्रेनर हिच्यासह सायकलने माजोर्ड्याहून बाणावलीला येत होता. यावेळी ज्ञानेश्वर नाईक (२0) या मूळ हुबळीच्या तरुणाने मोटरसायकलने त्याचा पाठलाग करून त्याच्या हातातील बॅग पळविली होती. स्थानिकांनी पोलिसांच्या मदतीने त्याला अटक केली. हा हडफडे-बार्देस येथे राहात होता व गाड्या धुण्याच्या कामासाठी तो रोज बाणावली भागात यायचा. पोलिसांनी त्याला अटक केल्यानंतर कोलवा, माजोर्डा, बेताळभाटी व बाणावली या भागात पर्यटकांच्या बॅगा लंपास केल्याचे त्याने कबूल केले. मात्र, या चोर्‍यांची नोंद कोलवा पोलिसांत झाली नव्हती. या आरोपीच्या खोलीवर पोलिसांनी छापा मारला असता, तेथे क्रॉस असलेली सोन्याची चेन, एक सोन्याचे नाणे व पोर्टेबल डिव्हीडी प्लेयर, दोन घड्याळे असा ऐवज सापडल्याची माहिती सिंग यांनी दिली. सध्या या चोरट्याला सहा दिवसांचा पोलीस कोठडीचा रिमांड देण्यात आला आहे. तिसरी घटना २९ मे रोजी कोकण रेल्वे स्थानकावर घडली. मूळ हुबळी येथील मारुती गायकवाड हा चोरटा एका प्रवाशाचे पाकीट मारून पळत असताना स्थानिकांनी त्याचा पाठलाग करून त्याला पकडून पोलिसांच्या स्वाधीन केले. या संशयिताचे अन्य दोन साथीदार नरेश कुमार व विनोद हे दोघे फरार असून याच दिवशी आणखी एका प्रवाशाचे ६५ हजार रुपये लंपास केले होते. हे पैसे या दोघा चोरट्यांनीच चोरले असावेत, असा पोलिसांचा संशय आहे. हे तिघेही धारवाडहून गाडीने गोव्यात आले होते, अशी माहितीही पोलिसांना प्राप्त झाली आहे. (प्रतिनिधी)