पणजी : काँग्रेसचे राष्ट्रीय प्रवक्ते रणदीप सुरजेवाला यांनी प्रसारीत केलेल्या राफेल डील संबंधीच्या ऑडिओ क्लीपशी माझा काहीच संबंध नाही. माझ्या आवाजाची कुणी तरी नक्कल केली असेल किंवा आवाजात फेरफार करून हा खोटा ऑडिओ बनविला असेल, असे आरोग्यमंत्री विश्वजित राणे यांनी म्हटले आहे. या प्रकरणाची चौकशी करण्याची मागणीही मुख्यमंत्री मनोहर पर्रीकर आणि पक्षाचे राष्ट्रीय अध्यक्ष अमित शाह यांच्याकडे केली असल्याचेही त्यांनी विशेष पत्रकार परिषद घेऊन सांगितले.
'राफेल संबंधीची सर्व माहिती माझ्या बेडरूममध्ये आहे असे मला पर्रीकर यांनी सांगितले आहे" असा संवाद विश्वजित यांच्या आवाजात व्हायरल झालेल्या ऑडिओत आहे. तसेच निलेश काब्राल यांनी अभियंत्यांची भरती करताना आपलीच माणसे भरली आहेत आणि बाबू आजगावकर यांचे प्रस्ताव मुख्यमंत्र्यांकडे पडून असल्यामुळे ते नाराज आहेत, असेही म्हणताना ऐकू येत आहे. एका माध्यमाच्या प्रतिनिधीशी फोनवर बोलत असताना ऑडिओचे कॉल रेकॉर्डींग करण्यात आले असावे, असे त्यांनी सांगितले.