लोकमत न्यूज नेटवर्क, सावईवेरे : शास्त्रीय संगीत हे भारतीय संस्कृतीचे एक अभूतपूर्व असे अंग आहे. ते अतिशय समृद्ध व उच्च दर्जाचे संगीत असून, आध्यात्मिक साधना व मोक्ष प्राप्तीचे साधन म्हणून शास्त्रीय संगीताकडे पाहिले जाते, असे प्रतिपादन संस्कार भारतीच्या कोकण व गोवा प्रांतचे संघटनमंत्री उदय शेवडे यांनी केले.
पद्मविभूषण उस्ताद झाकीर हुसेन यांना समर्पित 'स्वरवर्षाव' या नवव्या शास्त्रीय संगीत संमेलनाच्या उद्घाटनप्रसंगी ते प्रमुख पाहुणे म्हणून बोलत होते. केरी फोंडा येथील -विजयादुर्गा देवस्थान व विजयादुर्गा सांस्कृतिक मंडळातर्फे कला आणि संस्कृती संचालनालय गोवा सरकार यांच्या सहकार्याने हे संमेलन आयोजित केले आहे. विजयादुर्गा संस्थानच्या सभामंडपात झालेल्या या सोहळ्यास व्यासपीठावर विजयादुर्गा सांस्कृतिक मंडळाचे अध्यक्ष मनोहर देसाई, सत्कारमूर्ती भजनी कलाकार बाबूराव भांडीये, देवस्थानचे कोषाध्यक्ष विलास जठार, मंडळाचे उपाध्यक्ष योगेश गोब्रे, कार्यक्रमाचे समन्वयक मनोज आमशेकर उपस्थित होते.
श्री. शेवडे म्हणाले की, आपल्या भारत देशावर पूर्वी झालेल्या अनेक आक्रमणांच्या काळातदेखील संगीतावर प्रभाव झालेला आहे. शास्त्रीय संगीताची वेदांपासून परंपरा असून, अनेक वाद्यांमधून संगीताची निर्मिती झालेली आहे. माणसांचे दिव्यत्व हे कलेच्या माध्यमातून पद्धतशीरपणे प्रकट होऊ शकते. शास्त्रीय संगीताच्या माध्यमातून एकाग्रता, शिस्त, नम्रता, सेवाभाव अशा अनेक चांगल्या गुणांची जोपासना, निर्मिती व संस्कार आपल्यावर होत असतात. गुरुकुल पद्धत, कुटुंब व्यवस्था व भारतीय कला या तीन गोष्टींमुळे आपले स्वत्व व सत्व हे कायम टिकून आहे.
शास्त्रीय संगीताचे महत्त्व
सर्वप्रथम कार्यक्रमाचे समन्वयक मनोज आमशेकर यांनी प्रास्ताविकातून शास्त्रीय संगीताचे महत्त्व उदहरणासहित विशद केले. पाहुण्यांची ओळख मनोहर देसाई यांनी करून दिली. यानंतर उदय शेवडे यांच्या हस्ते ज्येष्ठ भजनी कलाकार व शिक्षक बाबूराव भांडीये यांचा शाल, श्रीफळ, स्मृतिचिन्ह व मानपत्र देऊन सत्कार करण्यात आला. प्रा. सुभाष जाण यांनी मानपत्राचे वाचन केले. यावेळी उदय शेवडे यांचाही सन्मान करण्यात आला. सूत्रनिवेदन उर्वी देसाई यांनी केले, तर मंडळाचे उपाध्यक्ष योगेश गोब्रे यांनी आभार मानले.