राज्यात झेडपीची आचारसंहिता लागू; विरोधकांच्या आघाडीचा 'पत्ता' नाही, इच्छुक उमेदवार गोंधळलेले 

मतपत्रिकेद्वारेच होणार निवडणूक : पालिका क्षेत्रात आचारसंहिता नाही, नेत्यांमध्ये चर्चेचे गुऱ्हाळ सुरू

पणजी: राज्यात जिल्हा पंचायत निवडणुकीचे वेळापत्रक राज्य निवडणूक आयुक्त मिनीन डिसोझा यांनी काल, शनिवारी जाहीर केले. त्यानुसार २० डिसेंबर रोजी झेडपीच्या ५० जागांसाठी निवडणूक होणार असून २२ डिसेंबरला मतमोजणी व निकाल जाहीर केला जाईल. त्यानुसार राज्यात आचारसंहिता लागू झाली आहे. 

मात्र, पालिका क्षेत्रात आचारसंहिता लागू नसेल. निवडणुकीचा कार्यक्रम जाहीर होताच उमेदवार निश्चित करण्यासाठी सर्व पक्षांचे नेते कामाला लागले आहेत. यावेळेस उमेदवारांना प्रचारासाठी केवळ १८ दिवसच मिळणार आहे, अशी माहिती राज्य निवडणूक आयुक्त मिनीन डिसोझा यांनी काल पत्रकार परिषदेत दिली. यावेळी डिसोझा यांनी निवडणुकीच्या संपूर्ण कार्यक्रमाची सविस्तर माहिती दिली.

विरोधकांच्या आघाडीचा 'पत्ता' नाही

जिल्हा पंचायत निवडणुकीचे बिगुल वाजले आहे. मात्र, विरोधकांत शांतता असून 'आघाडी'चा तिढा अद्याप सुटलेला नाही. यातच आम आदमी पक्षाने एकला चलो रेची भूमिका घेत वाटचाल सुरू केली असून आरजीच्या हालचालीही तशाच आहेत. त्यामुळे निवडणूक जाहीर होऊनही विरोधी पक्षांत 'आघाडी'च्या चर्चेचे गुन्हाळ सुरू आहे.

विरोधकांमधील सर्वात मोठा पक्ष असलेल्या काँग्रेसने वास्तविक आघाडीसाठी पुढाकार घेणे अपेक्षित होते. परंतु त्यासाठी काँग्रेसने अधिकृतपणे इतर पक्षांशी बोलण्यासाठी एकही बैठक बोलवलेली नाही. त्यानंतरचा मोठा पक्ष आम आदमी पक्षाने निवडणुकीसाठी स्वतंत्र उतरण्याचा निर्णय घेत सर्व ५० जागा लढण्याची तयारी केली आहे. तर विधानसभेत एक आमदार असलेला रिव्होल्यूशनरी गोवन्स पक्ष हा बलाबलात तिसऱ्या क्रमांकचा पक्ष आहे. या पक्षाचे नेते कधी युतीच्या गोष्टी करतात तर कधी युती शक्य नसल्याचे  संकेत देणारी वक्तव्ये करतात. 

गोवा फॉरवर्ड आणि आपशी युती शक्य असल्याचे त्यांनी म्हटले होते. मात्र आरजीचे प्रमुख मनोज परब यांची अलिकडची वक्तव्ये ही तेही 'एकला चलो'च्या दिशेने जाणारी दिसत आहेत.

या पार्श्वभूमीवर एकच पक्ष सध्या युती करण्यासाठी प्रयत्न करीत असल्याचे दिसून येत आहे आणि तो म्हणजे गोवा फॉरवर्ड पक्ष. पक्षाचे श्रेष्ठी आमदार विजय सरदेसाई यांनी आतापर्यंत त्यासाठी पूरक आणि सकारात्मक विधानेच केली आहेत.

काँग्रेसचे युरी आलेमाव यांनी जेव्हा गोवा फॉरवर्ड फुटिरांना प्रवेश देत असल्याचा आरोप केला, तेव्हाही सरदेसाई यांनी आक्रमक भुमिका न घेता त्यांनी पक्षात घेतलेले इजिदोर फर्नाडिस यांना उमेदवारी मिळणार नाही, असे सांगून टाकले. परंतु त्या नंतरही युतीच्या बोलणीसाठी काँग्रेसकडून प्रतिसाद मिळत नसल्याचे गोवा फॉरवर्डच्या सूत्रांकडून सांगण्यात आले.

सोमवारचा मुहूर्त चुकल्यास...

२० डिसेंबर रोजी होणाऱ्या निवडणुकीसाठी १ ते ९ डिसेंबरपर्यंत अर्ज भरण्याची मुदत आहे. त्यामुळे युतीची बोलणी, उमेदवारांची निवड आणि अर्ज भरणे ही प्रक्रिया करायची झाल्यास युतीसाठी सोमवार, दि. १ डिसेंबर रोजीच शिक्कामोर्तब करणे आवश्यक आहे. हा मुहूर्त गमावल्यास विरोधक स्वतः 'टेन्शन'मध्ये येणार हे निश्चित.

उत्तर गोवा मतदारसंघ

हरमल, मोरजी, धारगळ, तोरसे, शिवोली, कोलवाळ, हळदोणा, शिरसई, हणजूण, कळंगुट, सुकूर, रेईश मागुस, पेन्ह दी फ्रान्स, सांताक्रूझ, ताळगाव, चिंबल, खोलीं, सेंट लॉरेन्स, लाटंबार्से, कारापूर-सर्वण, मये, पाळी, होंडा, केरी, नगरगाव.

दक्षिण गोवा मतदारसंघ

उसगाव-गांजे, बेतकी-खांडोळा, कुर्टी, वेलिंग-प्रियोळ, कवळे, बोरी, शिरोडा, राय, नुवे, कोलवा, वेळ्ळी, बाणावली, दवली, गिर्दोली, कुडतरी, नावेली, सावर्डे, धारबांदोडा, रिवण, शेल्डे, बार्से, खोला, पैंगिण, सांकवाळ, कुठ्ठाळी.

नियमावली पाळा : डिसोझा

डिसोझा यांनी सांगितले की, निवडणूक प्रक्रिया पारदर्शक, शांततापूर्ण व सुयोग्य पद्धतीने पार पडावी यासाठी सर्व आवश्यक उपाययोजना केल्या आहेत. राज्यभरातील सर्व विभागांनी दक्षता राखावी आणि आचारसंहिता पाळावी, असे आवाहनही त्यांनी केले.

भरारी पथके स्थापन

निवडणूक आयोगाने जे अधिकारी सध्या एसआयआरच्या कामात गुंतलेले नाहीत, त्यांना या निवडणूक प्रक्रियेत सहभागी करून घेण्याचा निर्णय घेतला आहे, असे डिसोझा यांनी सांगितले. राज्यात आचारसंहिता लागू झाल्याने उल्लंघन रोखण्यासाठी विशेष भरारी पथके नियुक्त केली असून ही पथके कारवाई करतील.

५ लाख रुपये खर्च मर्यादा

ही निवडणूक पक्ष पातळीवर लढविली जाणार असून उमेदवाराला खर्चाची मर्यादा ही ५ लाख रुपये इतकी ठेवण्यात आली आहे. त्या पेक्षा अधिक खर्च केल्यास ते आचारसंहितेचे उल्लंघन ठरणार आहे. उमेदवाराच्या खर्चावर लक्ष ठेवण्यासाठी यंत्रणा सक्रिय केली असून निरीक्षकांची त्यावर नजर असेल, असेही आयुक्तांनी सांगितले.

मतपत्रिकेद्वारे मतदान

राज्यात प्रत्येकवेळी जिल्हा पंचायतीसाठीचे मतदान हे मतपत्रिकेद्वारेच केले जाते. ईव्हीएमचा वापर या निवडणुकीत अजूनपर्यंत करण्यात आलेला नाही. यावेळीही त्यात बदल नसल्याचे राज्य निवडणूक आयोगाने स्पष्ट केले आहे.