डिचोली : आरोग्य खात्याची कर्मचारी असलेली अनुपमा गावकर (२४, वेळगे-सत्तरी) या तरुणीचा मृतदेह आमोणा नदीत सारमानस येथे सापडला. शुक्रवारी अनुपमान हिने आमोणा पुलावरून उडी मारली होती. तीन दिवसांच्या शोध मोहीमेनंतर तिचा मृतदेह सापडल्याची माहिती अग्निशमन दलाचे अधिकारी राहुल देसाई यांनी दिली.
वेळगे-सत्तरी येथील अनुपमा गावकर ही आरोग्य खात्यात काम करते. तिची दुचाकी आमोणा पुलावर पार्क केलेली होती. त्यामुळे तिथे दुचाकी पार्क करून नदीत उडी घेतल्याचा अंदाज व्यक्त करण्यात आला होता. स्थानिकांनी याची माहिती दिल्यानंतर डिचोली अग्निशामक दलाच्या जवानांनी शोधमोहीम सुरू ठेवली होती. शनिवारी दिवसभर शोध घेण्यात आला. मात्र, मृतदेह सापडला नव्हता. रविवारी सारमानस परिसरात हा मृतदेह सापडला.