Goa Lok Sabha Election 2024: लोकमत न्यूज नेटवर्क पणजी : तिसवाडी तालुक्यात सांताक्रुझ, कुंभारजुवेतील खिस्ती मते भाजपकडे वळवण्यासाठी आमदार रुडॉल्फ फर्नाडिस व राजेश फळदेसाई यांची कसोटी लागणार आहे.
सांताक्रुझ मतदारसंघात एकूण २९,३५४ मतदार असून यापैकी सुमारे ११,५०० ख्रिस्ती मते आहेत. खुद्द सांताक्रुझ, कालापूर, मेरशी भाग ख्रिस्तीबहुल आहे. काँग्रेसची ही एकगठ्ठा मते मानली जातात. २०१७ च्या विधानसभा निवडणुकीत टोनी फर्नांडिस हे काँग्रेसच्या तिकिटावर येथे निवडून आले; परंतु नंतर दोन वर्षांतच जुलै २०१९ मध्ये ते इतर नऊ आमदारांसोबत काँग्रेसमधून फुटून भाजपमध्ये आले.
२०२२ च्या विधानसभा निवडणुकीत टोनी यांना भाजपने तिकीट दिले; परंतु मतदारांनी त्यांना घरी पाठवले. अल्पसंख्याकांनी भाजपला मतदान केले नाही. रुडॉल्फ फर्नांडिस काँग्रेसच्या तिकिटावर निवडून आले; परंतु तेही सप्टेंबर २०२२ मध्ये फुटले व त्यांनी भाजपामध्ये प्रवेश केला. रुडॉल्फ यांची मते भाजपकडे वळवण्यासाठी कसोटी लागणार आहे.
सांत आंद्रेत सिल्व्हेरांवर भिस्त सांत आंद्रेमध्ये एकूण २१,२९५ मतदार आहेत. पैकी १०,५०० खिस्ती मतदार आहेत. येथे आरजीचे वीरेश बोरकर हे आमदार आहेत. फ्रान्सिस सिल्वेरा यांचा गेल्या विधानसभा निवडणुकीत भाजपच्या तिकिटावर केवळ ७० मतांनी पराभव झाला होता. गोवा वेल्हा, आगशी, सांत आंद्रे भागांत मोठ्या प्रमाणात ख्रिस्ती मतदार आहेत. त्यांचा कल नेहमीच काँग्रेसकडे राहिलेला आहे.
फ्रान्सिस सिल्वेरा यांनी पराभव झाला तरी आपले काम चालूच ठेवले आहे. विकसित भारत यात्रा तसेच अन्य कार्यक्रमांमध्ये ते भाग घेत असतात. सिल्वेरा हे भाजप उमेदवाराला किती मते मिळवून देतात पाहावे लागेल.
काँग्रेसची एकगठ्ठा मते
कुंभारजुवे मतदारसंघातही दिवाडी बेट, सांतइस्तेव्ह, जुने गोवेचा काही भाग, खोर्ली, सांपेद्र वगैरे भागांत ख्रिस्ती मतदारांची संख्या लक्षणीय आहे. एकूण २६,८१५ मतदारांपैकी ८,५०० मतदार ख्रिस्ती आहेत. या मतदारसंघात काँग्रेसच्या एकगठ्ठा मतांचा फेब्रुवारी २०२२च्या विधानसभा निवडणुकीत राजेश फळदेसाई यांना फायदा झाला. ते काँग्रेसच्या तिकिटावर निवडून आले; परंतु नंतर रुडॉल्फ व इतरांसोबत सप्टेंबर २०२२ मध्ये काँग्रेसमधून फुटून त्यांनी भाजपमध्ये प्रवेश केला. ही मते भाजपचे उमेदवार श्रीपाद नाईक यांच्याकडे वळवण्यासाठी फळदेसाई यांचीही कसोटी लागणार आहे.
पणजीत ख्रिस्ती आणि सारस्वत मते जाणार कोणाकडे?
दरम्यान, पणजी मतदारसंघात २२,३४० मतदार असून पैकी ६२०० ख्रिस्ती आहेत. यांत सुमारे १५०० मतदार ख्रिस्ती सारस्वत आहेत. ही १५०० मते आजपावेतो दिवंगत पर्रीकर यांच्या पारड्यात जात असत. पणजीत मुख्य कार्यालयाच्या मागील बाजूस तसेच चर्च स्क्वेअर परिसर, कांपाल, मिरामार येथे ख्रिस्तीबहुल भागातील मते नेहमीच काँग्रेसकडे जातात. चर्च स्वचेअर, मेरी इम्पॅक्युलेट हायस्कूल, होम सायन्स कॉलेज तसेच मिरामार येथील काही बुथांवर ख्रिस्ती मते बिगरभाजप उमेदवारांकडे जात असल्याचे याआधीच्या निवडणुकांमध्ये दिसून आले आहे. ही मते बाबुश यांना श्रीपाद यांच्याकडे वळवावी लागतील.
सांताक्रुझ मतदारसंघात एकूण २९,३५४ मतदार असून यापैकी सुमारे ११,५०० ख्रिस्ती मते आहेत. सांत आंद्रेमध्ये एकूण २१,२९५ मतदार आहेत. पैकी १०,५०० ख्रिस्ती मतदार आहेत.