गोवा: पार्टी करून परतताना अपघात, दोन तरूणांचा मृत्यू तर दोघं जखमी 

रविवारी पहाटे म्हापसा शहरापासून तीन किलोमिटर अंतरावर असलेल्या आसगाव येथील धोकादायक वळणावर गाडीला झालेल्या अपघातात वाहन चालकासहित दोघांचा मृत्यू झाला असून दोघेजण जखमी झाले आहेत.

म्हापसा: रविवारी पहाटे म्हापसा शहरापासून तीन किलोमिटर अंतरावर असलेल्या आसगाव येथील धोकादायक वळणावर गाडीला झालेल्या अपघातात वाहन चालकासह दोघांचा मृत्यू झाला असून दोघेजण जखमी झाले आहेत. जखमींवर सध्या उपचार सुरु करण्यात आले आहेत. अपघातातील सर्व जण येथील कॉलेजचे विद्यार्थी आहेत. पोलिसांनी दिलेल्या माहितीनुसार सदर घटना पहाटे तीनच्या दरम्यान सावंतवाडी आसगांव येथे घडली. अपघातग्रस्त जीए-०५-बी-३५३२ या गाडीतील सर्व जण कांदोळी येथील किनारी भागात पार्टीसाठी गेले होते. तेथून घरी जात असताना वाहन चालक इथेन व्हिएगस याचा वळणावर वाहनावरील नियंत्रण गेल्याने वाहनाची धडक रस्त्याच्या बाजूला असलेल्या एका घराच्या संरक्षक भिंतीला जोरदारपणे धडकली. त्यात इथेन व्हिएगस याचा जागीत मृत्यू झाला तर ली अ‍ॅना रोचा या युवतीचा उपचारा दरम्यान बांबोळी येथील गोवा वैद्यकिय महाविद्यालयात मृत्यू झाला. गाडीतील इतर दोन जखमी लियोन परेरा व झहीद शेख यांच्यावर उपचार सुरु करण्यात आले आहेत. हे सर्वजण १९ ते २१ दरम्यानच्या वयोगटातील असून म्हापसा येथील एका नामांकित कॉलेजचे विद्यार्थी आहेत.  घटनेनंतर लागलीच सर्वांना उपचारासाठी उत्तर गोवा जिल्हा इस्पितळात दाखल करण्यात आले. त्यावेळी इस्पितळातील डॉक्टरांनी इथेन व्हिएगस याला मृत घोषीत केले. ली अ‍ॅना रोचा या युवतीला तेथून बांबोळीला हलवण्यात आले. तेथील वॉर्ड १०६ उपचार सुरु असताना तिला मरण आले. इतर जखमींची प्रकृती चिंताजनक नसली तरी गंभिर असल्याची माहिती पोलिसांनी दिली आहे. अपघातातील वाहनाची धडक एवढी जोरदार होती की त्यात वाहनाचा दर्शनीय भाग पूर्णपणे नष्ट झाला होता.  पुढील तपास हणजुण पोलिसांकडून सुरु करण्यात आला आहे.