अप्पा बुवा, लोकमत न्यूज नेटवर्क, फोंडा: मागच्या काही महिन्यात भूमिगत झालेली गुन्हेगारी वृत्ती फोंड्यात पुन्हा डोके वर काढते की काय अशी परिस्थिती निर्माण होत असून, शिरोडा येथे दारूच्या नशेत दोघांनी चार युवकांना मारहाण करून जखमी केल्याची घटना घडली आहे. मागच्या महिन्यात गोवा अभियांत्रिकी महाविद्यालयाच्या विद्यार्थ्याला मारहाण केल्यानंतरचीही दुसरी घटना होय.
गुरुवारी रात्री झालेल्या मारहाणीची फोंडा पोलिसांनी लगेचच दखल घेतली असून काराय - शिरोडा येथे दारूच्या नशेत ४ जणांना मारहाण केल्याप्रकरणी फोंडा पोलिसांनी अक्षय रमेश नाईक व रवीकुमार काळू गोसावी (पंडेगाळ- शिरोडा) याना अटक केली आहे. मारहाणीत गंभीर जखमी झालेले शोधन नाईक याच्यावर इस्पितळात उपचार सुरू असून कार्तिक नाईक, जयेश नाईक व सुजय नाईक या जखमीवर उपचार करून घरी पाठविण्यात आले आहे.
फोंडा पोलिसांनी दिलेल्या माहितीनुसार काराय येथे एका दारूच्या दुकानाबाहेर गुरुवारी रात्री ११ वाजण्याच्या सुमारास दोन गटात शिल्लक कारणावरून अगोदर वादावादी झाली. वादावादीचे पर्यावरण लगेचच मारामारीत झाले. संशयियांनी नंतर चार युवकांना बेदमपणे मारहाण केली. यात ४ जण जखमी झाले. जखमींना उपचारसाठी अगोदर शिरोडा प्राथमिक आरोग्य केंद्रात दाखल करण्यात आले. त्यापैकी गंभीर जखमी झालेल्या शोधन नाईक याला अधिक उपचारासाठी मडगाव येथील इस्पितळात दाखल करण्यात आले. फोंडा पोलिसांनी संशयितांना अटक केली असून निरीक्षक तुषार लोटलीकर यांच्या मार्गदर्शनाखाली उपनिरीक्षक आदित्य नाईक गावकर या प्रकरणी अधिक तपास करीत आहेत.