लोकमत न्यूज नेटवर्क पणजी : 'मंत्रिमंडळ फेररचनेच्या चर्चाबाबत मी काहीच बोलणार नाही. याबाबत मुख्यमंत्र्यांना विचारावे. कारण, मंत्री काम कसे करतात, मंत्री कोणाला करावे याचा निर्णय मुख्यमंत्री घेतात. त्यामुळे मुख्यमंत्र्यांनी सर्व मंत्र्यांच्या कामाचा, प्रगतीचा आढावा घ्यावा,' असे कृषी मंत्री रवी नाईक यांनी म्हटले आहे.
'कोणता मंत्री कसे काम करीत आहे, हे मुख्यमंत्री अभ्यासतात. मी त्यावर काही भाष्य करू शकत नाही. पण मी मुख्यमंत्री असताना कधीही, कुठल्याही मंत्र्याची विकेट काढली नाही. ते स्वत:च आपली विकेट पाडत होते,' असे मिश्कील भाष्य नाईक यांनी केले.
सद्यस्थितीत मुख्यमंत्री प्रमोद सावंत यांच्या नेतृत्वाखाली सरकार उत्तम काम करीत आहे. कामगिरी चांगली आहे. ते नागरिकांशी वेळोवेळी संवाद साधून समस्या जाणून घेतात, शक्य असतील ती कामे करतात, असेही नाईक यांनी म्हटले आहे. आताच्या फेरबदलात कोणाची विकेट जाते हे पाहू' असेही नाईक म्हणाले.