लोकमत न्यूज नेटवर्क, पणजी : मुख्यमंत्री प्रमोद सावंत यांनी मंगळवारी उच्चस्तरीय बैठकीत 'पीएम सूर्यघर मुफ्त बिजली' योजनेचा आढावा घेतला. २०२७ पर्यंत २१ हजार रुफ टॉप सोलर सिस्टम बसवून ६५ मेगावॅट सौर ऊर्जा निर्मितीचे उद्दिष्ट असून ते पूर्ण करण्यासाठी मुख्यमंत्र्यांनी आवश्यक त्या सूचना अधिकाऱ्यांना केल्या.
बैठकीनंतर पत्रकारांना माहिती देताना मुख्यमंत्री म्हणाले की, राज्यातील गरीब तसेच मध्यमवर्गीयांपर्यंत पोहचून या सर्वांना सौर ऊर्जा निर्मितीसाठी प्रोत्साहित केले जाईल. आजपर्यंत ४ हजार ७०० हून अधिक अर्ज मंजूर करण्यात आले व ७.३४ मेगावॅट सौर ऊर्जा निर्माण झाली. लाभार्थीना ४.२८ कोटी रुपये सबसिडी वितरित करण्यात आली आहे.
बैठकीत २५ वर्षे देखभालीसाठी कंत्राटदार नेमण्याच्या प्रक्रियेला गती देणे, सरकारी इमारती, हॉटेल्स, निवासी संकुले तसेच नव्या व जुन्या इमारतींवर मोठ्या प्रमाणात सौर ऊर्जा निर्माणासाठी लोकांना प्रोत्साहन देणे, विनामूल्य विद्युत योजना मोडीत काढून पीएम सूर्यघर मुफ्त बिजली योजनेत समाविष्ट करून काही घटकांना रुफ टॉप सोलर सिस्टम सक्तीची करणे आदी महत्त्वाच्या मुद्यांवर चर्चा करण्यात आली. स्वच्छ हरित ऊर्जा, शाश्वतता आणि शून्य कार्बन उद्दिष्टांना प्राधान्य देण्याचा निर्णय घेण्यात आला.
नवीकरणीय ऊर्जेसाठी सरकारने अर्थसंकल्पात यंदा ६२.१५ कोटी रुपयांची तरतूद केली आहे. किनारी भागांमध्ये सीएनजी, बायोफ्युअल तसेज अन्य नवीकरणीय ऊर्जा स्रोतांना प्रोत्साहन दिले जाईल. केंद्र सरकार व जिल्हा खनिज निधीतून ६० कोटी रुपये खर्च करुन प्रायोगिक तत्त्वावर मॉडेल सोलर व्हिलेज अर्थात सौर गाव विकसित केला जाईल. संपूर्ण गावाला लागणारी वीज सौर माध्यमातून निर्माण करण्याचा संकल्प आहे.
किसान क्रेडिट कार्ड, हर घर नल से जल, शंभर टक्के साक्षरता आणि इतर अनेक प्रमुख क्षेत्रांमध्ये गोवा चमकला. हे लक्ष्य साध्य करण्यासाठी ज्यांनी परिश्रम घेतले त्यांचा सत्कार केला जाईल, असेही मुख्यमंत्र्यांनी सांगितले. 'संकल्प से सिद्धी'सोबत आम्ही विकसित गोवा, विकसित भारत या दृष्टीकोनासाठी आमची वचनबद्धता व्यक्त करतो, असेही ते म्हणाले. बैठकीस नियोजन व सांख्यिकी खात्याचे संचालक व्ही. सक्सेना व इतर अधिकारी उपस्थित होते.
११ हजार लखपती दीदींना सक्षम करणार
केंद्रात मोदी सरकारने अकरा वर्षे पूर्ण केल्याने या काळात झालेला विकास व इतर उपलब्धींसंबंधी जनतेपर्यंत माहिती पोचवण्यासाठी 'संकल्प से सिद्धी' कार्यक्रमाचा आढावा मुख्यमंत्री प्रमोद सावंत यांनी काल बैठकीत घेतला. डबल इंजिन सरकारच्या प्रभावी प्रवासात राज्य सरकारनेही काही उद्दिष्टे निश्चित केली असून मुख्यमंत्र्यांनी काल बैठकीत ११ हजार लखपती दीदींना सक्षम करण्याचे महत्त्वाकांक्षी टार्गेट दिले. विविध स्वावलंबन आणि महिला सक्षमीकरण उपक्रम राबवण्यात येणार असल्याचे ते म्हणाले.