लाेकमत न्यूज नेटवर्क
गडचिराेली : स्थानिक नगर परिषदेची विशेष सभा नगराध्यक्ष योगीता पिपरे यांच्या अध्यक्षतेखाली मंगळवारी पार पडली. या सभेत शहर विकासाच्या पाच मुद्द्यांवर चर्चा करण्यात आली. विशेष म्हणजे न. प. प्रशासनाच्या वतीने शहरातील सर्व नळधारकांच्या नळाला जलमापक यंत्र बसविण्यात येणार आहे. याबाबतचा निर्णय सर्वानुमते घेण्यात आला.
मार्च २०२१ ते डिसेंबर २०२१ या १० महिन्यांच्या कालावधीकरिता घनकचरा व्यवस्थापनाअंतर्गत शहरातील नाल्या सफाई करणे व नालीतील मातीमिश्रित गाळ जमा करून वाहनाद्वारे नगर परिषदेच्या घनकचरा व्यवस्थापन केंद्रावर वाहतूक करण्याच्या कामाकरिता अंदाजपत्रानुसार येणाऱ्या खर्चाचे नियोजन करण्यात आले. बर्ड फ्लू या संसर्गजन्य आजाराचा शहरात प्रादुर्भाव झाल्यामुळे सार्वजनिक आरोग्याच्या दृष्टिकोनातून तत्काळ व दीर्घकालीन उपाययोजना करण्याविषयी चर्चा करण्यात आली. शहरामध्ये सध्या प्रगतिपथावर असलेल्या मलनिस्सारण प्रकल्पाची कामे पूर्ण होण्यापूर्वी प्रक्रियायुक्त सांडपाण्याचे पुनर्चक्रिकरण व पुनर्वापर आराखडा तयार करण्यासाठी नियोजन करण्यात आले. प्रधानमंत्री आवासयोजना अंतर्गत शासकीय जमीन नियमानुकूल करण्यासाठी गोकुलनगर येथील रामतूर तुकूम सर्व्हे क्र.१३१, आराजी १.७४.०० हे.आर.चौ. मी.शेतीचे स्थानिक मुरूम खदानबाबतचा निस्तार हक्क कमी कारणसाठीचा ठराव सर्वानुमते पारित करण्यात आला.
सभेला नगर परिषद उपाध्यक्ष अनिल कुनघाडकर, मुख्याधिकारी संजीव ओव्होड, बांधकाम सभापती प्रवीण वाघरे, सभापती मुक्तेश्वर काटवे, वर्षा नैताम, प्रशांत खोब्रागडे, नगरसेवक प्रमोद पिपरे, नंदकिशोर काबरा, केशव निंबोड, लता लाटकर, नीता उंदिरवाडे, रमेश चौधरी, सतीश विधाते, भुपेश कुलमेथे, रमेश भुरसे, गुलाब मडावी, वैष्णवी नैताम, अनिता विसरोजवार, रितू कोलते, मंजूषा आखाडे, गीता पोटावी, रंजना गेडाम, संजय मेश्राम, पूजा बोबाटे, वर्षा बट्टे आदी उपस्थित होते.