आरमोरी : आरमोरीकडून गडचिरोलीकडे येणाऱ्या कारला विरूद्ध दिशेने येणाऱ्या भरधाव ट्रकने समोरून धडक दिल्याची घटना गडचिरोली-आरमोरी मार्गावर गाढवी नदीच्या पुलावर आज शुक्रवारी घडली. या अपघातात शिक्षक प्रमोद संगमवार हे किरकोळ जखमी झाले. तर कारचा मागील भाग क्षतीग्रस्त झाला. मात्र कोणतीही जीवितहानी झाली नाही. प्राप्त माहितीनुसार, आज शुक्रवारी येथील शिक्षक प्रमोद संगमवार हे एमएच-४०-एसी-५०७४ क्रमांकाच्या कारने कुटुंबियांसह आरमोरीवरून गडचिरोलीकडे येत होते. दरम्यान गडचिरोलीकडून आरमोरीकडे जाणाऱ्या एमएच-३१-सीबी-७१७६ क्रमांकाच्या भरधाव ट्रकने कारला समोरून धडक दिली. यावेळी कारचा मागील भाग पुलाच्या एगलला धडक देऊन थोडा पुढे गेला व मागील चक्का एगलला अडकल्याने सदर कार नदीपात्रात कोसळली नाही. सदर अपघात भिषण होता. मात्र संगमवार कुटुंबियांना कोणतीही हानी पोहोचली नाही. यावेळी वाहनामध्ये संगमवार यांची पत्नी, मुलगी, सासू व चालकही होता. या अपघातात किरकोळ जखमी झालेल्या प्रमोद संगमवार यांना आरमोरीतील उपजिल्हा रूग्णालयात दाखल करण्यात आले आहे. या अपघाताची माहिती मिळताच आरमोरी पोलीस ठाण्याचे पोलीस निरीक्षक मोरे हे आपल्या कर्मचाऱ्यांसह घटनास्थळी दाखल झाले. या घटनेसंदर्भात ट्रकचालक प्रशांत सुधाकर तिजारे रा. नागपूर याच्यावर गुन्हा दाखल केला आहे. या घटनेचा पुढील तपास पोलीस करीत आहे. (प्रतिनिधी)
ट्रकने कारला दिली जबर धडक
By admin | Updated: November 15, 2014 01:38 IST