हलबा जमातीच्या प्रश्नांवर विचारमंथन

राष्ट्रीय हलबा जमात महामंडळ व हलबा जमात संघटना गडचिरोली यांच्या संयुक्त विद्यमाने रविवारी येथील...

गडचिरोलीत राष्ट्रीय परिषद : आदिवासी हलबा आरक्षणावरही झाली चर्चागडचिरोली : राष्ट्रीय हलबा जमात महामंडळ व हलबा जमात संघटना गडचिरोली यांच्या संयुक्त विद्यमाने रविवारी येथील जिल्हा मध्यवर्ती सहकारी बँकेच्या सभागृहात आयोजित सत्यशोधक आदिवासी हलबा आरक्षण परिषदेत हलबा जमातीच्या विविध ज्वलंत प्रश्नांवर विचारमंथन करण्यात आले. हलबा जमातीला आरक्षण व हक्क मिळण्यासाठी संघटितरीत्या एकत्रित येऊन शासनाच्या विरोधात लढा उभारण्याचा एकमुखी निर्णय या परिषदेत घेण्यात आला.हलबा जमातीच्या राष्ट्रीय परिषदेच्या अध्यक्षस्थानी बी. के. हेडाऊ होते. यावेळी उदय धकाते, राकेश कुंभारे, अभयकुमार धकाते, डॉ. सुशील कोहाड, राकेश देविकर, गजानन सोरते, प्रशांत सिलेकर, सूरज कवाडघरे, दीपक बोकडे, मनोहर धकाते, रवींद्र निमजे, महादेव कुंभारे आदी प्रामुख्याने उपस्थित होते. देशात वास्तव्यास असलेल्या आदिवासी हलबा जमातीला महाराष्ट्र शासन सापत्न वागणूक देत आहे. या जमातीस शासन अस्पृश्य समजून जात पडताळणीच्या माध्यमातून वाळीत टाकले जात आहे. यामुळे हलबा जमातीचे लोक पूर्णपणे खचले आहेत. अशा परिस्थितीत शासनाच्या विरोधात तीव्र लढा उभारण्यासाठी रणनिती आखणे गरजेचे आहे. त्यासाठीच या परिषदेचे आयोजन करण्यात आले आहे, असे प्रतिपादन परिषदेचे अध्यक्ष बी. के. हेडाऊ यांनी केले. या परिषदेचे प्रास्ताविक हलबा जमात महामंडळाचे अध्यक्ष उदय धकाते, संचालन रूपराम निमजे यांनी केले तर आभार राकेश देविकर यांनी मानले. (स्थानिक प्रतिनिधी)हे झाले सर्वानुमते निर्णयहलबा समाजाच्या महाराष्ट्रातील आमदारांनी वर्षातून एकदा समाजाची तसेच सर्व समाज संघटनांची एकत्रित बैठक घ्यावी, सदर आमदारावर समाजाच्या हक्कासाठी महामंडळाने दबावगट निर्माण करावा, हलबा जमातीचा अभ्यासगट निर्माण करावा, हलबा जमातीतील कोणत्याही पदाधिकारी व कार्यकर्त्यांनी समाजविरोधी कार्य केल्यास त्यांना सामाजिक कार्यापासून दूर करणे, समाजाच्या प्रश्नावर मोर्चा, उपोषण व आंदोलन करणे, आदी निर्णय परिषदेत घेण्यात आले.