कोरची : मरारटोली येथील वसंता दसरू मोहुर्ले यांच्या घरालगत असलेल्या गोठ्यातून ४ शेळ्या व ३ बकरे शुक्रवारी पहाटेच्या सुमारास अज्ञातांनी पळवल्याची घटना घडली आहे.
वसंता दसरू मोहुर्ले यांच्या घरालगत असलेल्या गोठ्यात ५ बकरे व १७ शेळ्या होत्या. चोरटयांनी त्यातील ४ शेळ्या व ३ बकरे लंपास केले. अचानक शेळ्यांचा आवाज आल्यामुळे घरामध्ये झोपलेले वसंता मोहुर्ले यांना जाग आली. ते घराबाहेर पडण्यासाठी निघाले असता, चोरट्यांनी घराच्या दरवाजाची कडी बाहेरून लावली होती.
त्यामुळे मागच्या दरवाज्यातून ते बाहेर आले. ताेपर्यंत चाेरटे ४ शेळ्या व ३ बकरे घेऊन पसार झाले होते. याप्रकरणी कोरची पोलीस स्थानकामध्ये अज्ञातांविरोधात गुन्हा दाखल करण्यात आला असून, अधिक तपास सुरु आहे.