मुलचेरात गटशिक्षणाधिकाऱ्यांना निवेदन : मानधन वाढ त्वरित लागू करामुलचेरा : अत्यल्प मानधनात शाळेमध्ये शालेय पोषण आहार शिजविणाऱ्या कर्मचाऱ्यांच्या विविध प्रलंबित मागण्यांकडे शासन व प्रशासनाचे लक्ष वेधण्याकरिता आयटकच्या नेतृत्त्वात कर्मचाऱ्यांनी बुधवारी मुलचेरा पंचायत समितीसमोर तीव्र निदर्शने केली. त्यानंतर गटशिक्षणाधिकारी हेडाऊ यांच्याशी समस्यांवर चर्चा करून मागण्यांचे निवेदन त्यांना सादर केले. शालेय पोषण आहार कर्मचारी मागील १४ वर्षांपासून ग्रामीण व नगर परिषद शाळांमध्ये शालेय पोषण आहार शिजविण्याचे काम तसेच शाळा उघडणे तसेच शाळेची देखरेख, स्वच्छता व इतर कामे प्रामाणिकपणे करीत आहेत. त्यामुळे त्यांना चपराशी कम कुक या पदावर नेमून १५ हजार प्रतिमाह वेतन द्यावे, जुन्या स्वयंपाकी महिलांना कामावर ठेवावे, नवीन अतिरिक्त कर्मचाऱ्यांना निवडीच्या प्रकारावर पायबंद घालावा, ५ तारखेच्या आत कर्मचाऱ्यांचे मानधन व इंधन बिल त्यांच्या बँक खात्यावर जमा करावे, स्वयंपाकी महिलांचे अद्यापही मानधन वाढले नाही, मागील हिवाळी अधिवेशनात शिक्षणमंत्री विनोद तावडे यांनी पाच ते साडेसात हजार मानधन वाढीचे आश्वासन दिले होते. परंतु ते अद्यापही पूर्ण झाले नाही. पोषण आहार कर्मचाऱ्यांना पोषण आहार शिजविण्याव्यतिरिक्त कामे देऊन नयेत, दिल्यास त्याचा अतिरिक्त मोबदला द्यावा, प्रत्येक गॅस सिलिंडरचा पुरवठा करावा, वयाच्या ६० वर्षानंतर किमान तीन हजार पेंशन देण्यात यावे, तालुक्यातील अनेक कर्मचाऱ्यांना एक वर्षापासून इंधन बिल प्राप्त झाले नाही. त्यामुळे ते त्वरित द्यावे, असे निवेदनात म्हटले आहे. निवेदन देताना संघटनेचे अध्यक्ष विनोद झोडगे, पौर्णिमा मालाकार, किशोर सुनतकर, सुमित्रा घोष हजर होत्या. (तालुका प्रतिनिधी)
शापोआ कर्मचाऱ्यांची निदर्शने
By admin | Updated: June 20, 2015 02:16 IST