आमिषाला बळी न पडता प्रतिकार करा

स्त्री अत्याचाराच्या घटनांमध्ये दिवसेंदिवस वाढ होत असून या घटनांना पायबंद घालण्यासाठी महिलांना सुसंस्कृत व कार्यक्षम होणे गरजेचे आहे. काही असामाजिक तत्व अल्पवयीन मुली

आशा मिरगे यांचे आवाहन : पोलिसांतर्फे महिला सुरक्षाविषयक कार्यशाळा
गडचिरोली : स्त्री अत्याचाराच्या घटनांमध्ये दिवसेंदिवस वाढ होत असून या घटनांना पायबंद घालण्यासाठी महिलांना सुसंस्कृत व कार्यक्षम होणे गरजेचे आहे. काही असामाजिक तत्व अल्पवयीन मुली तसेच युवतींना आपल्या प्रेमपाशात ओढून घेण्याचा प्रयत्न करतात. त्यासाठी विविध प्रलोभने ते दाखवितात. त्यामुळे अशा आमिषाला बळी न पडता त्याचा प्रतिकार प्रत्येक मुलींनी करावा, असे प्रतिपादन राज्य महिला आयोगाच्या सदस्य आशा मिरगे यांनी केले.
जिल्हा पोलीस दलाच्यावतीने जागृती सप्ताहानिमित्त स्थानिक पटेल मंगल कार्यालयात आयोजित महिला सुरक्षा विषयक मार्गदर्शन कार्यशाळेत त्या बोलत होत्या. कार्यक्रमाच्या अध्यक्षस्थानी पोलीस अधीक्षक संदीप पाटील होते. प्रमुख अतिथी म्हणून अप्पर अधीक्षक (प्रशासन) राजकुमार शिंदे, गडचिरोलीचे उपविभागीय पोलीस अधिकारी डॉ. राहूल खाडे, पोलीस निरीक्षक उमेश बेसरकर उपस्थित होते.
डॉ. राहूल खाडे यांनी राज्य महिला आयोगाच्या सदस्य आशा मिरगे यांचा परिचय करून दिला. त्यानंतर आशा मिरगे यांनी उपस्थित महिला व विद्यार्थिनींना मार्गदर्शन केले. गर्भधारणेपासून पौगांडावस्थेपर्यंतच्या बदलांची माहिती आशा मिरगे यांनी यावेळी दिली. व्यक्तींमध्ये शरीरसुखाची भूक वाढल्यानेच समाजात अनाचार घडतात. विद्यार्थिनींनी अश्लील साहित्य, मालिका, चित्रपट, पोर्नसाईटस् यापासून दूर राहावे, सकारात्मक विचारांना प्राधान्य द्यावे, असे आवाहन त्यांनी केले. कार्यक्रमाचे संचालन जनसंपर्क अधिकारी प्रवीण निंबाळकर यांनी केले. (शहर प्रतिनिधी)